TEA YAPONGEZWA UBORESHAJI WA MIUNDOMBINU YA ELIMU TANZANIA BARA NA Z'BAR

Mkurugenzi wa Idara ya Elimu Mbadala na Elimu ya Watu Wazima Zanzibar, Bi. Mashavu Ahmada Fakih, ameipongeza Mamlaka ya Elimu Tanzania (TEA) kwa mchango wake mkubwa katika kuimarisha sekta ya elimu nchini, huku akiwataka wadau wa maendeleo na wananchi kuendelea kuchangia Mfuko wa Elimu ili kuongeza ubora wa elimu kwa vizazi vya sasa na vijavyo. Bi. Mashavu ametoa pongezi hizo alipotembelea banda la TEA katika Maonesho ya 50 ya Biashara ya Kimataifa ya Dar es Salaam (Sabasaba) ambapo amesema mamlaka hiyo imeendelea kuwa mshirika muhimu wa Serikali katika kuhakikisha kila Mtanzania anapata haki yake ya elimu bila kujali mahali anapoishi. Pia, amesema mamlaka hiyo imechangia kwa kiasi kikubwa kuboresha miundombinu ya elimu Tanzania Bara na Zanzibar hali ambayo imeongeza ubora wa mazingira ya kufundishia na kujifunzia. 1h