KINGU APONGEZA WANANCHI NA WANAHABARI KWA USHIRIKI MKUBWA WA KAMPENI IKUNGI MAGHARIBI.

SINGIDA: Mgombea ubunge wa Jimbo la Ikungi Magharibi kupitia Chama cha Mapinduzi (CCM), Mhe. Eribariki Kingu, amewapongeza wananchi wa jimboni humo kwa kujitokeza kwa wingi katika mikutano yake ya kampeni, sambamba na kuwashukuru wanahabari wote waliokuwa wakifuatilia na kuripoti kampeni hizo kwa ufanisi mkubwa. Akizungumza na wanahabri nyumbani kwake Sepuka mara baada ya kufunga rasmi kampeni zake, Mhe. Kingu alisema amefarijika kuona mwitikio mkubwa wa wananchi waliompa nafasi ya kueleza dira na vipaumbele vya maendeleo ambavyo atavisimamia endapo ataendelea kulitumikia jimbo hilo. "Nawashukuru sana wananchi wa Ikungi Magharibi kwa kujitokeza kwa wingi katika mikutano yetu ya kampeni. Hii ni dalili ya imani kubwa mliyonayo kwa chama chetu cha Mapinduzi na kwa serikali yetu," alisema Kingu. Aidha, alitoa pongezi maalum kwa wanahabari wote waliokuwa sehemu ya kampeni hizo, akisema mchango wao umewezesha wananchi wengi kupata taarifa sahihi kuhusu masuala ya kisiasa na maendeleo jimboni humo.