“Babək”in qalmaqallı inquş gözəli Pərvin kimdir? – TAMARA YANDİYEVA HAQQINDA MARAQLI FAKTLAR

Tamara Xavaj qızı Yandiyeva 25 iyul 1955-ci ildə Qazaxıstanın Karaqanda vilayətində dünyaya gəlib. Milliyyətcə inquşdur. Rusiyanın əməkdar artisti, İnquşetiyanın isə Xalq artistidir. Tamara dünyaya gələndən sonra ailəlikcə İnquşetiyaya qayıdıblar. Valideynləri sanatoriyada işlədiklərindən elə orda da qalırdılar. Tamara özü uşaqlıqdan kinoya vurğun idi. 3 yaşından atası onu açıq meydanlarda olan kino çəkilişlərinə apararmış. O, məktəb yaşına çatanda ailəsi onu böyük bacısı ilə birgə Orconikidze şəhərindəki 1 nömrəli internat məktəbinə göndəriblər. Qızları evə ildə bir-iki dəfə gətirərmişlər. Ancaq 5-ci sinifdən sonra onu adi orta məktəbə qoyurlar. Məktəb illərində o, qiraət müsabiqələrində iştirak edir. Tamara orta məktəbi bitirəndən sonra Moskva Kinematoqrafiya İnstitutuna qəbul olunmaq istəyir. Lakin atası onun bu istəyinə qarşı çıxır, sərt reaksiya verir. O, qızının həkim olmasını istəyir. Tamara atasının təkidi ilə kimyadan müəllim yanına getmək üçün Qroznıya yollanır. Yandiyeva özü danışır: "Qroznıda xalamgildə qalırdım. O, çox inkişaf etmiş, savadlı filoloq idi. Mənim istəyimi bilən kimi, dedi get, sına özünü. Atan icazə vermir, qəbul olunmasan özün də soyuyarsan o arzudan. Xalamla qərara gəldik ki, sınayaq görək, aktrisalıq iddiasında olmaq üçün hansısa əsasım, istedadım varmı? Biz onun özü kimi gözəl, fransız dili müəlliməsi olan rəfiqəsi ilə getdik imtahana. Üç turdan sonra imtahan götürən sənətkar Merkurev özü mənə yaxınlaşıb – "siz qəbul olundunuz, təbrik edirəm” - deyəndə, sevincimi təsəvvür edə bilməzsiz. Lakin Yandiyevanın atası bundan sonra da qızının aktrisalığına icazə vermir. Hətta atasının yanına xahişə gələn ailənin yaxın qohumu, tanınmış rejissor Sulumbəy Mamilov və Mədəniyyət Nazirliyindən nümayəndə heyəti minnətçi düşür, lakin bunun da faydası olmur. Günlərin birində isə ailənin yaxın qohumlarından bir gənc dünyasını dəyişir. Yas mərasimində mərhumun atası göz yaşları içində Tamaranın atasından Tamaranın oxumasına icazə verməsini xahiş edir. Kişi bu dərdli qocaya etiraz edə bilmir. Tamara dərhal əşyalarını yığıb Leninqrada yollanır. Onun kurs rəhbəri Vasili Merkurev olur. Tamara 1979-cu ildən M. Lermontov adına Qroznı Rus Dram Teatrında işləməyə başlayır. Tamaşalarda müxtəlif rollarda oynayır. Bakıda isə Eldar Quliyevin çəkməyə hazırlaşdığı "Babək” filminə Pərvin rolu üçün aktrisa axtarışı gedirmiş. Tamaranın filmə çəkilməsinə Xalq artisti Rasim Balayev səbəb olur. O, xatirələrində deyir: “Hələ "Babək”ə çəkiləcəyim dəqiqləşməmişdi, gördüm ki, bu qız Pərvin roluna çox yarayır. Dedim, şəklini verərsən mənə. Gördüm, çox təəccüblü və şübhəli baxdı üzümə. Dedim, qorxma, mən evliyəm, ailəmə də sadiqəm. Şəklin bizim kinostudiyaya lazımdır, ola bilər, səni kinoya dəvət etsinlər”. Aktrisa ilk dəfə tammetrajlı bədii filmə 1979-cu ildə Bakıda Eldar Quliyevin çəkdiyi "Babək” filmində Pərvin roluna çəkilib. Rasim Balayev aktrisanın şəklini Eldar Quliyevə verib. Rejissor bəyənib və onu filmin çəkilişlərinə dəvət ediblər. Aktrisanın dediyinə görə, Rasim Balayevin təklifi ilə onu Azərbaycanda filmə çəkilməyə dəvət ediləndə böyük sevinclə gəlib: Yerli mətbuatda gedən məlumatlara görə, film çəkilişləri zamanı Pərvin roluna kənardan aktrisa dəvət edilməsinə ən sərt reaksiya verən tanınmış sənətkar, Xalq artisti Amaliya Pənahova olub. O, Tamara Yandiyevanın bu obraza çəkilməsinə qarşı çıxıb və deyilənlərə görə, hətta, çəkilişlər zamanı bir neçə dəfə qalmaqal yaşanıb. Tamara Yandiyevanın Azərbaycan kinosunda növbəti rolu "Gözlə məni" filmində - Xalq yazıçısı İlyas Əfəndiyevin məşhur "Mahnı dağlarda qaldı" dramı əsasında çəkilmiş filmdəki Şahnaz obrazı olub. Maraqlıdır ki, bu filmdə də Amaliya xanımla birlikdə rol alıblar. Tamara Yandiyeva indi soyadına Dağlı soyadını da əlavə edib. O. Həyat yoldaşı ilə "Qara şahzadə” filminin çəkilişləri zamanı tanış olublar. Hətta çəkilişlər toydan sonra yarımçıq qalıb. Müqaviləni pozduğu üçün onlara hədə-qorxu gəliblər. Ailə qurandan sonra həyat yoldaşı icazə vermədiyi üçün filmlərə az çəkilir. Vokalist kimi fəaliyyət göstərir. Aktrisa ümumilikdə 18 filmə çəkilib. Bunların 16-da baş rol ifa edib. #tamara #inquş #inquşetiya #tamarayandiyeva #kulisaz #kulis edebiyyat #maraqlifaktlar #incesenet #filmoqrafiya #aktyorlar #aktrisalar #şairlər #sairler #qeyriadibilgiler #babek #pervin #babekfilmi #azerbaycankinosu #amaliya #amaliyapenahova #pərvin