🔵ADO SHAIBU AIKOSOA VIKALI HOTUBA YA WAZIRI MKUU

Mbunge wa Jimbo la Tunduru Kaskazini, Ado Shaibu, amekosoa vikali hotuba ya Waziri Mkuu aliyoitoa jana, akidai imewakosea Watanzania na kudhoofisha uwajibikaji katika kushughulikia matukio ya utekaji. Akizungumza leo Mei 24, 2026 jijini Dodoma mbele ya wanafunzi wa vyuo vikuu ambao ni wanachama wa Chama cha ACT-Wazalendo, Ado Shaibu amesema kauli ya Waziri Mkuu kwamba matukio ya utekaji “sio halisi bali yanatengenezwa kuiharibia sifa Serikali” ni kosa kubwa linaloweza kuyafanya vyombo vya ulinzi na usalama kutochukua hatua stahiki. Amedai pia kuwa kosa la pili katika hotuba hiyo ni kutaka taifa lisahau yaliyotokea Oktoba 29, 2025 wakati wa Uchaguzi Mkuu, akisisitiza kuwa haiwezekani kusahau bila waliohusika kuwajibika. Akitaja kosa la tatu, Mbunge huyo amesema Waziri Mkuu ametumia lugha zinazowagawa Watanzania kwa kurejesha maneno kama “vibaraka” na “wasaliti wa mabeberu”, akieleza kuwa msamiati huo unawachonganisha wananchi wanaoikosoa serikali dhidi ya vitendo vya utekaji na rushwa. "Hizi ni lugha za kuwagawa watu, kwamba sisi tunaoikabili Serikali dhidi ya utekaji na rushwa tuonekane kuwa ni vibaraka na wasaliti. Hizo ni lugha za kutugawa Watanzania," amesema.