“Yol kənarında tapılan Valeh Şirəliyevin ailəsi kömək istəyir”

Bu gün redaksiyamıza müraciət edən Şirəliyeva Seyidsənəm həyat yoldaşı Şirəliyev Valehin başına gəldiyini iddia etdiyi hadisə ilə bağlı ciddi ittihamlar səsləndirir. Onun sözlərinə görə, 2024-cü ildə həyat yoldaşı bir qrup şəxs tərəfindən döyülərək ağır vəziyyətdə yol kənarına atılıb. Şikayətçi bildirir ki, həyat yoldaşını uşaqları döyülmüş vəziyyətdə taparaq evə gətirib. Seyidsənəm Şirəliyevanın iddiasına əsasən, hadisə ilə bağlı dəfələrlə hüquq-mühafizə orqanlarına müraciət olunub. O bildirir ki, müxtəlif qurumlara etdiyi müraciətlərə baxmayaraq, indiyədək məsələnin tam araşdırılmadığını düşünür. Şikayətçi həmçinin qeyd edir ki, Daxili İşlər Naziri Vilayət Eyvazovun Astara rayonunda keçirdiyi vətəndaş qəbulunda iştirak edib, hadisə ilə bağlı əlində olan fotoşəkilləri və digər materialları təqdim edib. Onun sözlərinə görə, sonradan nazirliyə dəvət olunaraq izahatı dinlənilib və araşdırma aparılacağı bildirilib. Lakin Seyidsənəm Şirəliyeva iddia edir ki, verilən vədlərə baxmayaraq, bu günə qədər şikayəti üzrə hər hansı nəticə əldə edilməyib. Şikayətçi hadisə nəticəsində həyat yoldaşının səhhətində ciddi problemlər yarandığını, hətta insult keçirdiyini bildirir. Bundan başqa, o iddia edir ki, ailəyə məxsus olan, Keşlə qəsəbəsində yerləşən və gəlir mənbəyi kimi istifadə edilən torpaq sahəsi və obyekt də sonradan onların əlindən çıxıb. Səsləndirilən bütün bu fikirlər Şirəliyeva Seyidsənəmin şəxsi iddialarıdır və redaksiya olaraq qarşı tərəfin də mövqeyini işıqlandırmağa hazır olduğumuzu bildiririk. Mövzu ilə bağlı adı çəkilən şəxslərin və aidiyyəti qurumların mövqeyini dərc etməyə hazırıq. BNTV .az izləyin. Hadisələrin mərkəzindən xəbərləri sizə çatdırmağa davam edəcəyik.