اپنی زندگی میں جائداد کا بٹوارہ APNI ZINDGI ME JAIDAD KA BATWARAH BY QAZI MUFTI ZAFEER SAHAB QASMI

السلام علیکم مفتیان عظام صاحبان کی خدمت میں عرض گزارش ہیکہ زید کے چھ بیٹے ہیں اور چار لڑکیاں ہیں وہ اپنی حیات میں اپنی جائداد کوتقسیم کرنا چاہتا ہے ایابرابر برابرتقسیم کرے گایاکمی زیادتی کےساتھ تقسیم کرے گایا ان میں سے کسی ایک کو زیادتی کے ساتھ بقیہ کوکمی کے ساتھ تقسیم کرے گامدلل و مفصل با حوالہ جواب ارسال کرنے کی سعی فرمائیں عین نوازش ہوگی سائل محمد صابر ولد عبد الغنی محلہ بیوپاریان مرکز مسجد ضلع چورو راجستھان پن FATWA NO #109 OCT O3/DQBBK بسم اللہ الرحمٰن الرحیم الجواب وباللہ التوفیق انسان اپنی زندگی میں اپنی جائداد منقولہ و غیر منقولہ کا مالک و مختار ہوتا ہے اور اس کو ہر قسم کے تصرف کا حق حاصل ہوتا ہے اور کسی کو یہ حق بھی نہیں ہے کہ اسکو اپنی مِلک میں تصرف کرنے سے روکے مذکور فی السوال زید اگر اپنی جائداد اپنی حیات میں اولادوں کے درمیان تقسیم کرنا چاہتا ہے تو کر سکتا ہے لیکن زید اپنی زندگی میں جو بھی جائداد تقسیم کرے گا وہ ہدیہ (Gift) ہوگا واضح رہے ھدیہ (Gift) کرنے میں اولادوں کے درمیان برابری ضروری ہے خواہ وہ لڑکے ہوں یا لڑکیاں جیسا کہ حدیث پاک میں ہےہے وعن النعمان بن بشير أن أباه أتى به إلى رسول الله صلى الله عليه وسلم فقال: إني نحلت ابني هذا غلاماً، فقال: «أكل ولدك نحلت مثله؟» قال: لا قال: «فأرجعه» . وفي رواية ...... قال: «فاتقوا الله واعدلوا بين أولادكم»''۔ (مشکاۃ المصابیح ج ١ ص ٢۶١ باب العطایا ط قدیمی) ترجمہ:حضرت نعمان ابن بشیر رضی اللہ عنہ سے روایت ہے کہ (ایک دن ) ان کے والد (حضرت بشیر رضی اللہ عنہ) انہیں رسول کریمﷺ کی خدمت میں لائے اور عرض کیا کہ میں نے اپنے اس بیٹے کو ایک غلام ہدیہ کیا ہے، آپ ﷺ نے فرمایا : کیا آپ نے اپنے سب بیٹوں کو اسی طرح ایک ایک غلام دیا ہے؟ انہوں نے کہا : نہیں آپ ﷺ نے فرمایا تو پھر (نعمان سے بھی ) اس غلام کو واپس لے لو۔ ایک اور روایت میں آتا ہے کہ …… آپ ﷺ نے فرمایا: اللہ تعالی سے ڈرو اور اپنی اولاد کے درمیان انصاف کرو۔(مظاہر حق ج ٣ ص ١٩٣ باب العطایا ط دارالاشاعت) اور زید کو چاہئےکہ اپنی جائیداد میں سے اپنے لیے جتنا چاہے رکھ لے؛ تاکہ بوقتِ ضرورت کام آئے اور مابقیہ مال اپنی تمام اولاد میں برابر تقسیم کردے البتہ کسی بیٹے یا بیٹی کو کسی معقول وجہ کی بنا پر دوسری اولادوں کی بہ نسبت کچھ زیادہ دینا چاہے تو دےسکتا ہے یعنی کسی کی شرافت ودین داری یا غریب ہونے کی وجہ سے یا زیادہ خدمت گزار ہونے کی بنا پر اس کو دوسروں کی بہ نسبت کچھ زیادہ دے تو اس کی اجازت ہے اگر صاحبِ جائیداد اپنی زندگی میں اپنی بعض اولاد کو کچھ دینا چاہے اور دوسرے دل سے رضامند ہوں کہ ان کو دیا جانے والا حصہ اوروں کو دیا جائے اوران پر کسی قسم کا دباؤ وغیرہ نہ ہو اور صاحبِ جائیداد کا مقصد بھی ان اولاد کو محروم کرنا یا نقصان پہنچانا نہ ہو ، بلکہ کسی بنا پر وہ اپنے بعض بچوں کو کچھ دے رہا ہے تو یہ جائز ہے بشرطیکہ کسی اولاد کو محروم کرنا یا نقصان پہنچانا مقصد نہ ہو بصورت دیگر تقسیم غیر منصفانہ ہوگی اور زید گناہ گار ہوگا ________________________________ فقط والله تعالي اعلم بالصواب قاضی مفتی ظفیر (اسجد) قاسمی ابن فقیہ العصر قاضئِ شریعت حضرت اقدس مفتی نذیر احمد قاسمی نوّراللہ مرقدہ مفتی دارالافتاء والقضاء ضلع بارہ بنکی یوپی (ہند) الجواب صحیح قاضی مفتی ضمیراحمد غفرلہ قاضی مفتی ظہیر عفی عنہ 9935236877 رابطہ دارالافتاء 9044552261 14 صفرالمظفر 1442مطابق 02 اکتوبر 2020 جمعہ