Ku nama yo ku wa 26/09/2021: akamaro canke intererano y’ imigambwe yitwa ko itavuga rumwe na leta

Ikiyago co ku nama c'uno munsi kiza kuba gihagaze ku kamaro canke intererano y’ imigambwe yitwa ko itavuga rumwe na leta. Umukuru w’igihugu Evariste Ndayishimiye igihe yimikwa ku wa 18 ruheshi 2020, yemeye ibiganiro vyamaho hagati ya leta n’imigambwe kugira umwe wese aronke akaryo ko gutanga intererano yiwe mu guteza imbere igihugu. Yavuze ko hariho imvugo itegerezwa kuvaho muri politique nk’ikijanye n’uko umugambwe uvuga ko utavuga rumwe na leta. Ati utavuga rumwe na leta yatowe, iyindi leta uba ukorera aba ari iyihe ? Iciyumviro nk’ico caranagarutsweko kandi kw’igenekerezo rya 4 nyakanga 2021 ari kumwe n’abanya migambwe, aho yamenyesheje ko atipfuza ko aba nye politike bama mu mpari zidahera mu gihugu kirimwo démocratie. Mbega mu Burundi, imigambwe itavuga rumwe na leta irabaho ? Ni iki iterera mu kwubaka igihugu ? None mbega nyene itegerezwa kubaho ivuga rumwe na leta ? None imigambwe yose yoba ihamagarirwa kuvyumva kumwe ? Muri ico gihe, imigambwe yose ikora isangiye imvugo vyungura iki igihugu ? Canke kutavuga rumwe harico vyica mw’iterambere ry’igihugu ? uruhara rw’iyo migambwe nuruhe mu ntwaro ya démocrartie ? Abatumire ni batatu : 1. Nancy Ninette Mutoni, asanzwe ariwe avugira umugambwe uri ku butegetsi Cndd-fdd a 2. Umushingamateka Agathon Rwasa, asanzwe ari n’umukuru w’umugambwe Cnl, 3. Rémy Havyarimana, akurikiranira hafi ibijanye n’ugutatura amatati bidaciye mu ngimba, agaserukira imbere y’amategeko ishirahamwe Lueur d’Espoir, kaze muri kino kiyago