MILLIY LIBOS MILLAT FAXRI | Navoiy shahri

O‘zbekning do‘ppisi boshida anvor, Belbog‘i va to‘ni misoli do‘st-yor. Siymi zarin olsang olginu ammo, Tegma Do‘ppi, Belbog‘, To‘niga zinhor!!! Milliylik – bu faqat til yoki hudud emas, balki ajdodlarimizdan meros bo‘lib kelayotgan qadriyatlar, urf-odatlar va an’analar majmuasidir. Milliylikni saqlash va unga hurmat bilan yondashish – kelajak avlodga bebaho madaniy meros qoldirish demakdir. Milliy liboslar esa ana shu milliyligimiz va qadriyatlarimizning yorqin timsolidir. Ular xalqimizning tarixini, madaniyatini, dunyoqarashini o‘zida aks ettiradi. O‘zbek milliy liboslari – nafaqat chiroyli va nafis, balki ma’no-mazmunga boy bo‘lib, ular orqali ajdodlarimizning didi, san’ati va hayot tarzi aks etadi. Misol uchun, Do‘ppi – milliy g‘ururimizning ramzi hisoblanadi. U faqat naqshlari orqaligina emas, balki ma’naviy ifodasi bilan ham bebahodir. Milliy o‘zbek choponi – nafaqat issiq tutuvchi kiyim, balki hurmat va sha’n belgisidir. Atlas va adras – beqiyos nafosat va nafislik ramzi. Aziz yurtdoshlar! Qadrli hamshaharlar! Bugungi kunda milliy liboslar zamonaviy modaga uyg‘unlashtirilib, kundalik hayotimizda ham keng qo‘llanmoqda. Milliy kiyimlarimizni kiyish – bu nafaqat an’analarni asrash, balki o‘zligimizni anglash va unga hurmat bilan yondashish demakdir. Shunday ekan, qadriyatlarimizni har birimiz faxr bilan namoyon qilaylik, o‘zligimizni asraylik, ajdodlarimizdan qolgan bebaho merosni dunyoga ko‘z-ko‘z qilaylik! Keling! O‘zbekona liboslarda suratga tushing, tarix va madaniyatimizga hurmatingizni ko‘rsating! DILMUROD ERGASHEV Navoiy shahar hokimi