Katikkiro Charles Peter Mayiga alambudde amasiro ge Kasubi okulaba omulimu ogwasigalira.

Nga 12 Ntenvu 2025 Katikkiro yalangirira nga omulimu gw'okuzzaawo Muzibwazalampanga bwe guwedde, era yategeeza nti waliyo ebintu ebitonotono naye nga bikulu ebyali birina okukolebwako, omuli okusereka ennyumba eziri mu mbuga y'amasiro era wetutuukidde olwa leero nga zirabika bulungi, amayinja gasibiddwako, n'olujja lwakolebwako. Agamba nti ekikulu ekirina okukolebwa kwe kulabirira omulimu guno buli budde kubanga essubi, emmuli, enkuba bwetonnya zinaabuuka n'olwekyo zetaaga okulabirira okulaba nga omutindo tegugwa. Agamba nti enteekateeka ya situla omutindo etwaliramu ebifo ebikulu nga bino eby'obwakabaka. Katikkiro annyonnyodde nti ennyumba Muzibwazalampanga ye yali ennyumba enkulu Ssekabaka Muteesa mweyasisinkaniranga abagenyi abakulu abavudde ebweru n'emirimu egyenjawulo, n'olwekyo olujja lwa Muzibwazalampanga okufaanana nga bweruli kigendererwa kya kwagala kukuuma kifaananyi eky'edda. Katikkiro yebazizza Abalangira n'Abambejja, olw'okwenyigira mu kulongoosa ennyumba eziri mu mbuga, n'ategeeza nti kirungi empagi ey'Olulyo Olulangira omuva Kabaka okwenyigira era omulimu guwa essuubi n'abajja okukyala bafuna ekifaananyi ekirungi