शिवाजी विद्यापीठाकडून नवा सिद्धांत व समीकरण विकसित: संशोधक डॉ. ज्योती जाधव, शुभम सुतार यांची मुलाखत

कोल्हापूर येथील शिवाजी विद्यापीठाच्या जैवतंत्रज्ञान अधिविभागातील ज्येष्ठ संशोधक प्रा. ज्योती जाधव आणि त्यांचे संशोधक विद्यार्थी शुभम सुतार यांनी ‘थिअरी ऑफ पोअर कॉन्फ्लेशन’ आणि ‘शुभज्योत समीकरण’ विकसित केले आहे. ‘स्प्रिंजर नेचर’च्या प्रतिष्ठित ‘बायोचार’ या शोधपत्रिकेमध्ये नुकताच त्यांचा ‘‘थिअरी ऑफ पोअर कॉन्फ्लेशन’ अँड ‘शुभज्योत इक्वेशन’ इन दि ट्रिटमेंट ऑफ ब्रिलियंट ग्रीन डाय-कॉन्टॅमिनेटेड वॉटर युजिंग जामून लिव्ह्ज बायोचार’ हा तब्बल २८ पृष्ठांचा शोधनिबंध प्रकाशित झाला असून वैज्ञानिक जगताकडून त्यांच्यावर अभिनंदनाचा वर्षाव होत आहे. शिवाजी विद्यापीठाच्या जैवतंत्रज्ञान अधिविभागात गेल्या वीस वर्षांपासून औद्योगिक सांडपाणी प्रक्रिया, शुद्धीकरण आणि त्याचे व्यवस्थापन या विषयाच्या अनुषंगाने सातत्याने संशोधन सुरू आहे. विशेषतः वस्त्रोद्योग कारखान्यांमधून जी प्रदूषक रंगद्रव्ये सांडपाण्यात मिसळलेली असतात. त्यांच्यावर प्रक्रिया करून ते सांडपाणी नैसर्गिक पद्धतीने शुद्ध करण्याच्या दिशेने प्रा. ज्योती जाधव यांचे संशोधन केंद्रित आहे. त्या संशोधनाअंतर्गत त्यांनी या नव्या सिद्धांताचा व समीकरणाचा शोध लावला आहे. त्या अनुषंगाने डॉ. ज्योती जाधव आणि शुभम सुतार या गुरू-शिष्याच्या जोडीची विद्यापीठाचे जनसंपर्क अधिकारी डॉ. आलोक जत्राटकर यांनी घेतलेली ही विशेष मुलाखत...