ابوفله لعب لعبتي اللي برمجتها | لكن للأسف..😥

أبو فله نزل فديو من يومين وهو بيلعب العاب من برمجة المتابعين ، فدخلت اتفرج زي عادتي على اي مقطع ينزله ابو فله ، وفجأة لقيته بيلعب اللعبة بتاعتي ، بيلعب لعبتي اللي برمجتها له من سنه تقريبا، ايام ما كنت بتعلم البرمجة وكنت شغوف بتطوير الالعاب ، فكانت في دماغي فكرة إني اطور لعبة لشخصيه مشهورة بحبها وانا بتعلم ، فطورت له لعبة ، خدت مني وقت كبير لاني كنت لسه في مرحلة التعلم ، المهم اول ما فتحت المقطع لقيت الانترو او بداية المقطع عبارة عن لعبتي ، الانترو دايما بيبقى هو افضل جزء في المقطع ، بيستخدم عشان يخلي المشاهد ينجذب اكتر للمقطع ويكلمه للاخر وهو متحمس انه يشوف اللقطة او الجزء دا كامل داخل المقطع ، فأنا كنت في مبسوط جدا بكدا ،وايضا سعيد إن يكون ليا بصمة ولو بسيطه في مقطع في قناة ابو فله ، بعد الانترو اللي فيه جزء من لعبتي بدأ يوضح هيعمل ايه في المقطع ومره واحده قال هيدي اللي هيكسب واللي اللعبة تعجب المشاهدين 500 دولار ، ومن هنا وانا بقول الله اكبر ي فتاح ي عليم ي رزاق ي كريم ، كنت متحمس جدا لان الانترو كان لعبتي ، وبعدها لعب اللعبة الاولى وخدت وقت قصير لان فكرتها كانت بسيطة وصغيرة وبعدين بدأ في اللعبة الثانية ، لعبة كانت ممتازة جدا وفيها افكار جميله جدا وصاحبها تعب عليها اوي ، لكن للاسف مكنتش شايف فيها ايه شيء بيمثل ابو فله ، يعني لا الشخصيه شكله ولا الاصوات في اللعبة اصواته ، هي بس عبارة لعبة جميله جدا وحلوه بس ملهاش علاقة بأبو فله ، ، بس تمام ،ابو فله تقريبا لعب اللعبة دي في 10 دقايق من المقطع اللي مدته 15 دقيقة ، تمام مفيش مشاكل ، خلص اللعبة واداها تقييم ، جت بقى اللعبة اللي بعدها ، كان فيها مشكلة برمجية وخلصها بسرعه واداها برضو تقييم ، وبعدين جت لعبتي ، فكرة اللعبة كانت انها لعبة من الالعاب اللي تعصب وتنرفز لأن ابو فله بيحب الالعاب دي ومن اكتر الالعاب اللي بتجيب له مشاهدات على القناة هي الالعاب اللي تعصب ، لعب اللعبة حبها جدا وحب فكرة اللعبة ، وحب الاصوات اللي فيها وايضا الشخصية اللي هي عبارة عن وجه ابو فله ، وكمان خليت الاعداء في اللعبة عبارة عن اصدقاءه ، عشان اللعبة تبقى بتعبر عنه اكتر اللعبة كانت بتعتمد على معايير صناعة الالعاب ، وهو ان اللعبة كل اما تلعبها اكتر كل اما تحترفها اكتر ، مش معتمده على الحظ ، المهم ابو فله اول ما خسر ، ولقى نفسه هيلعب المرحلة من الاول تاني ودا الطبيعي مع ان هيبقى فيه اتشيك بوينت بعد كل جزء من اللعبة واللعبه كبيرة جدا وفيها مراحل حلوه كتير ، بس هو مقدرش يكمل ، مع ان اللعبة اللي اخدت 10 دقائق من المقطع كان بيخسر فيها ويرجع يعيد من الاول تاني وبيسرع المقطع ، عشان كان عايز يعمل مقطع كويس وفيه وقت كتير ، فكان لسه بيبدأ تقريبا تصوير المقطع ، وانا اعتقد اللعبة الثانية دي اخدت منه اكتر من 4 ساعات عشان يخلصها وعقبال ما وصل للعبة بتاعتي كان خلاص طاقته كلها راحت ، وبرغم من كدا كمل ولعب وعجبته جدا اللعبة ، بس كان تعب لدرجة انه نسى يقيم اللعبة بتاعتي اصلا ، فانا شايف من العدل تقسييم الجائزة على المركز الاول والتاني او تقسيمها على كل المشتركين وخلي كله يفرح لإن فيه ناس كتير جدا جدا عجبتهم اللعبة بتاعتي وقالوا انها افضل لعبة ، واللعبة وصلت لاكتر من 20 الف تحميل من وقت نزول المقطع ، فمن الاخر اللعبة بتاعتي لو كانت اخدت حقها في المقطع كانت المنافسه هتبقى عادلة بس انا فكل الاحوال فخور جدا ان اللبعة اللي برمجتها في مرحلة التعلم ، وصلت لابوفله شخصيا ، مقطع برمجة اللعبة كنت منزله على قناتي القديمة بس ياريت محدش يشوفه .. حساب الانستاجرام   / codegun00   #برمجة #ابوفله