DC MKUDE AZINDUA MRADI WA SOS WA WATOTO WAISHIO NA KUFANYA KAZI MTAANI

Lengo ni kuondoa watoto Mitaani na kuimarisha uwezo wa familia na kuwaunganisha na familia zao Mkuu wa Wilaya ya Arusha Mhe. Joseph Modest Mkude amesema kulingana na takwimu za Mei 2026, Mkoa wa Arusha una Jumla ya watoto wanaoishi na kufanya kazi Mtaani wapatao 631, kati yao 94 wakiwa wanalala mtaani, wengi wao wakipatikana kwenye Kituo Kikuu cha mabasi, Kituo kidogo cha Daladala Jiji la Arusha, Soko la Kilombero, Soko kuu na eneo la Mianzini Jijini Arusha. Mhe. Mkude ametoa takwimu hizo hii leo Jumatatu Juni 08, 2026 wakati wa uzinduzi wa mradi wa Shirika la SOS Children Villages wa watoto waishio na kufanya kazi Mtaani, mradi unaotarajiwa kutekelezwa katika Halmashauri za Jiji la Arusha, Meru na Arusha Dc, akisema ni matarajio yake kuwa mradi huo utaenda kuleta suluhu ya changamoto hiyo yenye kutatiza haki na upatikanaji wa malezi na malazi kwa watoto wa Mkoa wa Arusha. "Ni matarajio yetu kama Mkoa kwamba ifikapo 2029, Mkoa wetu uwe wa mfano na kwamba tunatarajia kuondoa watoto wetu wanaoishi na kufanya kazi mtaani na kuwaunganisha na huduma muhimu ikiwemo malezi, malazi, elimu, afya na ujuzi mbalimbali. Na nimesikia kwamba watoto takribani 750 wanatarajiwa kufikiwa nami nisisitize kwamba maeneo yote matatu yanapaswa kusimamiwa kikamilifu ili kwa pamoja tuhakikishe mtoto wa Kitanzania anakuwa salama." Amesema Mhe. Mkude. Kwa upande wake Mkurugenzi wa Shirika la SOS Tanzania Bw. Thomas Kipingili amesema mradi huo wa watoto waishio na kufanya kazi mtaani umelenga kuondoa watoto wanaoishi na kufanya kazi mtaani na kuwaunganisha na familia zao ama mifumo mingine salama ya malezi, kuimarisha uwezo wa familia katika kutoa malezi bora, matunzo na ulinzi wa mtoto kupitia uwezeshwaji wa kiuchumi, kijamii na huduma za msaada wa kisaikolojia na kijamii pamoja na kuimarisha mifumo ya serikali na jamii katika ulinzi wa mtoto ili kumtambua mtoto mapema anapokuwa katika mazingira hatarishi. Kipingili amesema kupitia malengo hayo, wanatarajia kupungua kwa watoto wanaoishi mtaani, kuimarika kwa ustawi wa familia na kuongezeka kwa uwezo katika kulinda watoto dhidi ya ukatili.