მე ვარ ფერმერი - ანტიბიოტიკების გამოყენება თაფლის ექსპორტს აფერხებს

ქართული თაფლის ექსპორტი ევროკავშირის ქვეყნებში რეალობად იქცევა, თუ ქართველი მეფუტკრეები ფუტკრის სამკურნალოდ ანტიბიოტიკებს აღარ გამოიყენებენ. ამ დროისთვის როგორც სურსათის ეროვნული სააგენტოს, ისე კერძო კომპანიების მიერ გაკეთებულ თაფლის ლაბორატორიულ სინჯების დიდ ნაწილში ევროკავშირში აკრძალული ანტიბიოტიკების მაღალი შემცველობა ფიქსირდება. დღეისათვის მსოფლიოში იწარმოება 1,9 მილიონი ტონა სასაქონლო თაფლი. აღნიშნული მონაცემი მეტყველებს თაფლზე მოთხოვნილების ყოველწლიურ ზრდაზე. ყველაზე მეტ თაფლს აწარმოებს ჩინეთი, სადაც თაფლის წარმოებამ შეადგინა 450 000 ტონა, რაც მსოფლიო წარმოების დაახლოებით მეოთხედს შეადგენს. აქედან დაახლოებით 140 000 ტონას ყიდის საზღვარგარეთ. მის მიერ წარმოებული თაფლის ყველაზე დიდი შემსყიდველები არიან იაპონია და ევროკავშირი. თავად ევროკავშირი წარმოადგენს თაფლის ერთ-ერთ უდიდეს მწარმოებელს. ევროკავშირი წელიწადში აწარმოებს 204 000 ტონა თაფლს. მიუხედავად ამისა, იგი ყოველწლიურად ყიდულობს 165 500 ტონა თაფლს. ევროკავშირში ამჟამად დარეგისტრირებულია 630 000 მეფუტკრე, რომელთა მფლობელობაშია 16 მილიონი ფუტკრის ოჯახი, რომლებიც ყოველწლიურად იღებენ დახმარებას 33,1 მილიონი ევროს ოდენობით. მხოლოდ გერმანია წელიწადში ყიდულობს დაახლოებით 90 000 ტონა თაფლს. ევროპის ბაზარზე ამჟამად თაფლის ყველაზე დიდი ექსპორტიორები არიან არგენტინა, ჩინეთი, მექსიკა, უკრაინა და ავსტრალია. ევროკავშირში შეტანილი თაფლის საშუალო საბითუმო ფასი მერყეობს 2,5-3,5 ევრომდე.