Sandiwara Tunggal R.C. Jamar Media - Bapa Tere (Audio Kaset)

Sigana keur para nonoman jaman milénial moal pati apal ka ngaran Jamar Media, iwal nu umurna 45-50 taun ka luhur. Dina kurun waktu taun 1970-1980 an, ngaran Jamar Media moal bireuk deui salaku tokoh nu kawéntar dina sandiwara/lawak tunggalna salian ogé kawéntar dina ngadalang wayang golék. Disebut tunggal téh istuning ngamaénkeun sandiwara atawa bobodoranana ku sorangan. Sigana moal aya nu mapakan dina kabisana ngarobah-robah sora, boh sora awéwé jeung lalaki dina sabaraha tingkatan umur, aki-aki, nini-nini, budak. Asana Wa Képoh gé masih disahandapeun Jamar Media dina ngola sora nu béda-béda. Jeung pasti urang teu nyangka yén nu maénna saurang. Bisa kasebut seniman sarwa bisa. Rékaman-rékaman kasétna sok diputer di sawatara radio di tiap wewengkon Priangan. Ngeunaan biografi anjeunna kawilang saeutik mun ngotéktak di internét. Ogé naha anjeunna ayeuna masih jumeneng atawa tos ngantunkeun. Ngan mun ngabandungan di salah sahiji rékaman vidéo ceramah anjeunna aya saeutik diguar ku anjeunna. Anjeunna téh kalahiran Manonjaya Tasikmalaya (perkiraan mah taun 1930-an). Pindah ka Cikalong Cianjur taun 1954. Mimiti ngadalang taun 1963. Eureun ngadalang taun 1981 kusabab dicaram ku sepuhna. Kasepuhnakeun mah sering diondang dina acara dakwah/siar Islam. Anjeunna ngadegkeun Tablighul Islamiyah.