Педагогикалык практика — мыкты кадрларды даярдоонун негизги баскычы

И.Арабаев атындагы Кыргыз мамлекеттик университети педагогикалык билим берүүнүүн флагманы жана мыкты кадрларды даярдоонун устаты катары педагогикалык практикаларга зор маани берет. Университеттин бардык структураларында ааламдашуу заманына ылайык илимий-техникалык жана саясий-экономикалык атаандаштыкка туруштук бере турган, билимдүү, заманбап кадрларды даярдоо жана теориялык билимди практика менен айкалыштыруу максатында педагогикалык практикалар өткөрүлүп турат. Кесиптик практика – студенттердин ар тараптан өнүгүүсүнө салым кошуп, кесипкөйлүк менен изденүүсүнө, окутуунун жаңы стратегияларын тажрыйбалуу методисттердин жетекчилиги астында өздөштүрүп, аны колдоно билүүгө үйрөтөт жана болочок мугалимдердин билим берүү чөйрөсүндө кесипкөй адис болуусун шарттайт. Практикалык сабактар сабак уюштуруу, аудиторияны жетектөө, окуучуларды баалоо сыяктуу педагогикалык билгичтиктерди жөнгө салса, ал эми педагогикалык практика студенттердин кесиптик компетенттүүлүгүн калыптандырып, келечектеги ишмердүүлүгүнүн маанилүү базасын түзөт.