Dating coach ni Rene, labis na nalulungkot sa sinapit ng batang MVP | DZXL News

Panayam kay Ateneo de Davao Boys basketball at Davao Regional Athletic Association Head Coach Jess Evangelio, kaugnay ng insidente na ikinasawi ng dalawang atleta ng ADMU basketball team. Labis ang pagdadalamhati ni Coach Jess Evangelio sa sinapit ni Rene Clert Baterbonia kasunod ng insidente sa dagat na ikinasawi nito. Umaasa si Coach Jess na makapagpahinga na nang maayos si Rene matapos ang trahedya. Ikinuwento rin niya ang matinding emosyon na naranasan niya noong una siyang dumating sa Manila para sa lamay ni Rene, kung saan aniya ay walang mga Ateneo coaches na personal na naroon sa mismong unang araw, at mas nakakalungkot na mas nangingibabaw ang mga impormasyong kumakalat sa social media kaysa sa direktang paliwanag ng mga taong sangkot. Dagdag niya, nakita niya mismo ang mga magulang ni Rene na naghihintay ng kasagutan, na lalong nagpabigat sa sitwasyon para sa kanya. Ayon pa kay Coach Jess, kilala niya si Rene bilang isang mahusay na manlalangoy kaya’t hindi niya inaasahan ang nangyari, at mahirap para sa kanya tanggapin ang trahedya lalo’t may mga payo naman na naibigay sa mga atleta sa kanilang outing. Giit niya, nais lamang ng pamilya ang buong katotohanan sa likod ng insidente. Aniya, labis siyang nagdadalamhati dahil si Rene ay itinuturing nilang “pride” ng kanilang koponan at ng Ateneo de Davao. —June 12, 2026