საამურის ტბის გათევზიანება 2024

საქართველოში საკმაოდ იშვიათია მეთევზე, ვისაც შეუძლია დაიტრაბახოს 10 კილოზე მეტი წონის თევზის დაჭერით, ვინაიდან ასეთი სიდიდის ეგზემპლარები სამწუხაროდ ძალიან იშვიათია ჩვენს ბუნებრივ წყალსატევებში. საამურის ტბის ადმინისტრაციის მიზანი იმთავითვე იყო ის, რომ შექმნილიყო ტბა, სადაც შესაძლებელი იქნებოდა უჩვეულოდ დიდი ზომის თევზის დაჭერა, თანაც ბუნებრივთან მაქსიმალურად მიახლოებულ პირობებში. 4 წელი დაგვჭირდა, რომ გვეპოვა ბუნებრივთან ძალიან მიმსგავსებული ტბორი, რომელიც თავისი მოხაზულობით, ფლორით, ფაუნით და რაც მთავარია ფსკერის რელიეფით, პრაქტიკულად იდენტური იქნებოდა ბუნებრივი წყალსაცავებისა. სწორედ ასეთ ტბაში დიდი თევზების შესახლების შემდეგ უკვე შესაძლებელი იქნებოდა შექმნილიყო საალაფო კობრის გაველურებული პოპულაცია, რომელზე თევზაობაც ძალზედ საინტერესო და აზარტული იქნებოდა. დიდი დრო დაგვჭირდა რომ საერთოდ გვეპოვა ასეთი ზომის თევზები. თუმცა მაინც გაგვიღიმა ბედმა და 500 ზე მეტი დიდი ზომის კობრი მაინც შევაგროვეთ ამ ერთი წლის განმავლობაში. ამ ვიდეოში გთავაზობთ ბოლო გათევზიანების კადრებს, სადაც ჩანს არაერთი დიდი ზომის საალაფო კობრი, რომლებიც უკვე გაშვებულია საამურის ტბაში, ეჩვევიან ველურ ცხოვრებას, საკვების დამოუკიდებლად მოპოვებას და რაც მთავარია მეთევზეებთან შერკინებას. შარშან გაშვებული ეგზემპლარები უკვე განთქმულები არიან თავისი დაუმორჩილებელი ხასიათით, და სულ ცოტა ხანში ეს თევზებიც ბევრ მძაფრ შეგრძნებებს აჩუქებენ საამურის ტბის ვიზიტორებს.