गोवर्धन वासी सांवरे, तुम बिन रह्यो न जाय । Govardhan Vasi Sanvare.. BHAJAN

गोवर्धन वासी सांवरे, तुम बिन रह्यो न जाये ॥ बंके चिते मुसकाय के, सुंदर वदन दिखाय । लोचन तलफें मीन ज्यों ही, पलछिन कल्प विहाय ॥१॥ गोवर्धन वासी.. सप्तक स्वर बंधान सों, मोहन वेणु बजाय । सुरत सुहाई बांधि के, मधुरे मधुर गाय ॥२॥ गोवर्धन वासी.. रसिक रसीली बोलनी, गिरिचढ़ गाय बुलाय । गाय बुलाइ धूमरी, ऊँची टेर सुनाय ॥३॥ गोवर्धन वासी.. दृष्टि परी जा दिवस ते, तब तें रुचे नही आन । रजनी नींद न आव ही, विसर्यो भोजन और पान ॥४॥ गोवर्धन वासी.. दरसन को नयना तपे, वचन सुनन को कान । मिलिवे को हियरा तपे, जियके जीवन प्रान ॥५॥ गोवर्धन वासी.. मन अभि-लाषा यह रहे, लगे ना नयन निमेष । इक टक देखौ आवतो, नटवर नागर भेष ॥६॥ गोवर्धन वासी.. पूरण शशिमुख देखके, चित चोट्यो वाहि ओर । रूप सुधा रस पान को, जैसे चन्द चकोर ॥७॥ गोवर्धन वासी.. लोक-लाज विधि वेद की, छांड्यो सकल विवेक । कमलकली रवि ज्यों बढे, छिन-छिन प्रीति विशेष ॥८॥ गोवर्धन वासी.. मन्मथ कोटिक वारिणे, निरखत डग मगी चाल । युवति जन मन फंदना, अंबुज नयन विशाल ॥९॥ गोवर्धन वासी.. कुंज भवन क्रीडा करो, सुख निधि मदन गोपाल । हम वृंदावन मालती, तुम भोगी भ्रमर भुवाल ॥११॥ गोवर्धन वासी.. यह रट लागी लाडिले, जैसे चातक मोर । प्रेम नीर बरसा करो, नव घन नंद किशोर ॥१२॥ गोवर्धन वासी.. युग-युग अविचल राखिये, यह सुख शैल निवास । श्री गोवर्धन रूप पर, बलजाई चतुर्भुज दास ॥१२॥ गोवर्धन वासी..