Wanafunzi wa ATC Wabuni Mfumo wa "Synexis" Kusimamia Matumizi ya Umeme Nyumbani

Katika wiki ya utafiti, ubunifu, na ujasiriamali inayoendelea katika Chuo cha Ufundi Arusha (ATC), wanafunzi wa mwaka wa kwanza wanaosomea masuala ya Sayansi ya Kompyuta wamebuni mfumo wa kidijitali unaojulikana kama "Synexis" (Smart Home Energy Monitoring System). Mfumo huu unalenga kusaidia kufuatilia takwimu za matumizi ya nishati ya umeme kwa kila kifaa kilichopo nyumbani. Kulingana na mmoja wa wabunifu hao, Mashi Shemo Mkilambe, mfumo huo una uwezo wa kukokotoa gharama za umeme kulingana na matumizi halisi ya kila kifaa. Data zote zinazokusanywa zinahifadhiwa kwenye kanzidata (database) ili kuwasaidia watumiaji kupata marejeo ya matumizi yao kwa wiki au mwezi. Mbali na kuonyesha gharama, mfumo huo pia unamsaidia mtumiaji kubaini ikiwa kuna uvujaji wa umeme au kifaa chochote kinachotumia nishati hiyo kwa kiwango kikubwa visivyo kawaida, jambo linaloweza kusaidia katika kupunguza gharama za maisha na matumizi yasiyo ya lazima ya nishati.