Zərərli vərdişlərdən qurtulmaq üçün 5 VACİB QAYDA

Zərərli vərdişlərdən qurtulma yolları haqqında elm nə deyir? Hər insan mütləq nə vaxtsa yeni bir başlanğıca addım atmaq, hansısa zərərli vərdişindən əl çəkmək istəyib. Bu istiqamətdə uğur əldə etmək üçün elm nə deyir? Pis-yaxşı, 2023-cü ilə başlamışıq. Və əminəm ki, çoxunuzun ürəyindən yeni başlanğıclar keçir. Peşmanlıq duyduğumuz çox şeyi arxada qoymaq istəyirik. Elə insanlar var ki, siqaret çəkmək, alkoqol asılılığı onların peşmanlıqlar siyahısında ilk sıralardadır. Hətta qeyri-düzgün qidalanan insanlar da bu zərərli vərdişlərindən əl çəkmək istəyir. Təcrübə göstərir ki, ilin əvvəlində bu cür dəyişikliklərə hazır olduğunu sanan insanların 80%-i ilin ilk yarısındaca planlarından əl çəkir və adət etdikləri həyat tərzinə qayıdır. Yola davam edənlər, cəmi, 20% olur. Bəs, biz bu 20% insandan nə öyrənə bilərik? Bəzi insanlar hədəflərinə çatmaqda şanslı ola bilirlər. Fəqət bir qrup insan var ki, fərqində olmadan zərərli vərdişlərdən əl çəkmək mövzusunda elmi nəzəriyyələri tətbiq edirlər. Bu nəzəriyyə nədir? Təxmin etdiyiniz kimi, ilk sırada əzm dayanır. Bəli, əzm hədəfinə çatmağa çalışan insanların əlindəki yeganə açardır. Bir zərərli vərdişdən əl çəkməyi 6 dəfə də sınaqdan çıxara bilərsiniz, 20 dəfə də. Uğurlu nəticə üçün əzmin olması mütləqdir. İkincisi, plan tutmaqdır. Əlbəttə, zərərli vərdişdən qurtulmaq üçün ani bir qərar vermək, elə həmin gün qərarın qətiliyini sınaqdan çıxarmaq mümkündür. Amma əvvəlcədən plan tutmaq, sonra hər şeyi planlı şəkildə həyata keçirmək uğurlu nəticə əldə etmək şansını 10 dəfə artırır. Üçüncüsü, doğru zamanı seçməkdir. Gündəlik həyatımızda motivasiya və enerji səviyyəmiz daim dəyişir. Bu səbəblə də, zərərli vərdişdən imtina etmək qərarı doğru zamanda verilməlidir. Motivasiyamızın yüksək, enerjimizin bol olduğu vaxt zərərli vərdişdən imtina edəcəyimiz barədə qərar versək, uğurlu nəticəyə daha tez çatarıq. İlk uğursuzluqda geri çəkilməmək də elm adamlarının tövsiyələrindəndir. Başqa sözlə, ilk cəhdiniz boşa çıxdısa, bunu əldə bəhanə etmək düzgün deyil. Əksinə, səhvlərdən nəticə çıxarmaqla ikinci dəfə vaxtında və daha əzmlə cəhd etmək şansımız var. Məsələn; dəyişmək və ya imtina etmək istədiyiniz vərdişiniz haqqında düşünün, sonra dəyişmək/imtina etmək səbəblərinizi sıralayın və qarşınıza çıxan əngəlləri yaxından tanıyın ki, dəf edə biləsiniz. Özgüvən də zərərli vərdişlərdən əl çəkmək istiqamətində önəmli faktorlardandır. Özünüzə inanmağınız hədəfə doğru gedərkən ən yaxşı yol yoldaşıdır. Özgüvən hissinizi artırmaq üçün daha əvvəl bacardıqlarınızı düşünün, nəyə qadir olduğunuzu özünüzə söyləyin, yeni bir dəyişikliyə nail olmaq gücünüzün yetərliliyinə inanın. Və dəyişikliyin sizə qazandıracağı şeyləri xəyal edin. Məsələn; siqareti tərgitməyə çalışırsınızsa, nələr itirəcəyinizi deyil, ən azından, cibinizdə qalacaq pulu və daha rahat yatacağınızı düşünün. Ümumi nəticəyə baxsaq, qısaca belə demək mümkündür: özünüz üçün ən uyğun zamanı seçin, plan tutun və plana sadiq qalın. Uğura doğru gedərkən etdiyiniz bir-iki səhvdən utanmayın və məhz o səhvlərə görə, geriyə-yolun başına qayıtmayın. Yaxşı olar ki, onları səhv yox, təcrübə kimi dəyərləndirəsiniz. Ən əsası, özünüzə inanın və qazanacağınız şeyləri düşünün.