Նիկոլ Փաշինյանին հեռացնելն ամենահեշտ գործն է, եթե կա հստակ «հետո». հարցեր, որոնց պատասխանել է պետք

Նիկոլ Փաշինյանը պետք է հեռանա։ Օր առաջ պետք է գնա։ Միայն թե նա գնա, հետոն կարևոր չէ․ նա գնա, հետո կհասկանանք՝ ինչ անենք։ Օրվա հրամայականը հաճախ այսպես է ձևակերպվում։ Եվ որքան ընտրությունները մոտենան, այնքան ավելի հաճախ կլսենք նման հայտարարություններ։ Այս մոտեցման մեջ է թաքնված գլխավոր ռիսկը և տապալումների հիմնական պատճառը։ Նիկոլ Փաշինյանի հեռանալուց ավելի կարևոր է՝ «հետոն»։ Սա պետք է հստակ ֆիքսել։ Ավելի կարևոր, ավելի բարդ և ավելի վճռորոշ, քան նրա հեռացումն ինքնին։ Ավելին՝ Նիկոլ Փաշինյանին հեռացնելն, իրականում, ամենահեշտ գործն է, եթե կա հստակ «հետո»։ Ահա հենց այդ «հետոյի» բացակայությունն է երկարաձգել Փաշինյանի իշխանության կյանքը, որը տրամաբանորեն, առնվազն պաշտոնավարման երկրորդ տարում, պետք է ընդհատված լիներ՝ 2020-ին։ 2020-ից հետո բազմաթիվ իրավիճակներ են եղել, երբ թվացել է, որ ուր որ է իշխանությունից Փաշինյանի հեռացումը անխուսափելի կլինի․ մինչև ամառ, մինչև ձմեռ, հազիվ կպահի իշխանությունը մինչև գարուն ու կհեռանա մինչև աշուն։ Բայց ոչ։ Մենք 2026 թվական ենք թևակոխում․ նա ոչ միայն իշխանության ղեկին է, այլ պատրաստվում է առաջիկա ընտրություններին։