PUTIN AIPA SIFA TANZANIA KATIKA ZIARA YA RAIS SAMIA NCHINI URUSI

Rais wa Jamhuri ya Muungano wa Tanzania Dkt. Samia Suluhu Hassan ameandika historia kwa kuwa Rais wa kwanza wa Tanzania kufanya ziara ya kiserikali nchini Urusi baada ya zaidi ya miaka 50 tangu ziara ya Mwalimu Julius Nyerere mwaka 1969, huku Rais wa Urusi Vladimir Putin akieleza kuwa hatua hiyo ni ishara ya kuimarika kwa uhusiano wa kidiplomasia kati ya mataifa hayo mawili. Akimkaribisha Dkt. Samia nchini Urusi, Putin amesema mwaka huu Tanzania na Urusi zinatimiza miaka 65 ya uhusiano wa kidiplomasia, akibainisha kuwa uamuzi wa Tanzania kuichagua Urusi kuwa miongoni mwa mataifa ya kwanza kwa ziara ya kiserikali unaonesha dhamira ya dhati ya kuendeleza ushirikiano wa kihistoria uliopo. Kwa upande wake, Dkt. Samia amesema ziara hiyo ni ya kihistoria kwa Tanzania na inalenga kuimarisha ushirikiano wa pande mbili katika maeneo ya maendeleo, uchumi, biashara na ustawi wa wananchi. Amesema Tanzania inathamini urafiki na ushirikiano wake na Urusi na inaona ziara hiyo kama fursa muhimu ya kujadili mustakabali wa maendeleo ya mataifa hayo. Viongozi hao pia wameeleza dhamira ya kuendelea kushirikiana katika masuala ya kimataifa na kukuza ushirikiano wa kiuchumi, huku Dkt. Samia akitarajiwa kushiriki katika Jukwaa la Kimataifa la Uchumi la St. Petersburg na kupokea shahada ya heshima kutoka Chuo Kikuu cha Patrice Lumumba nchini humo.