Gamini Fonseka 20th Commamoration Emperor of Sri Lankan Cinema

මා ලියූ ගාමිණී ෆොන්සේකා චරිතාපදානය ‘ගාමිණී- ශ්‍රී ලංකේය සමාජ ප්‍රවාහය අභිමුව’ ඉතාම ඉහළ ප්‍රමිතියකින් යුක්තව මුද්‍රණය අවසන් තිබිණි. තාරක ප්‍රකාශක අධිපති රෝලන්ඩ් ඒ. ප්‍රනාන්දුගේ නොපසුබට උත්සාහයෙහි ප්‍රතිඵලයක් ලෙස ශ්‍රී ලංකා සිනමාවේ 'අධිරාජයාට' උචිත වන "රජ දැක්ම" ක් 2004 මාර්තු 22 වන දින, ගාමිණී සිය දිවියෙහි 66 වන උපන් දිනය සැමරූ දිනට පසුදින කොළඹ බණ්ඩාරනායක සම්මන්ත්‍රණ ශාලාවෙහි පැවත්වූවෙමු. එදින දිගු කලකට පසු ඔහුට තිරයේ පැරණි පෙම්වතියන් සියලුදෙනා මුණගැසිනි. ඔහු වෙත රෝස මල් පිලිගන්වා සුබ පැතූ සියලු පැරණි හා නූතන සිනමා ශිල්පීන් සමග ඔහු මහත් සතුටෙන් සම්භාශනයෙහි යෙදිනි. කලකට පසු ගාමිණී , මාලනී හමුවු ඒ මොහොතේ, ඇය ගාමිණීගේ ගෙල වටා අලංකාර රෝස මල් මාලයක් පැළඳවූවාය. ඒ සියලුදෙනා මැද වේදිකාවට කැඳවුණු මගේ අතින් ග්‍රන්ථයෙහි මුල්පිටපත සිනමා සක්විති අතට පිරිනැමිණි. ඒ මොහොතේ ගාමිණී, මාලනීට මාව හඳුන්වා දුන්විට ඇය කලින් ගාමිණීට පළදවා ඒ වනවිට ඇගේ දෑතෙහි රඳවාගෙන තිබූ මල් මාලය මගේ කරට පළදවන විලාසයක් දැක්වූවාය. නිමේෂයක් පමණක් වූ ඒ මොහොත මගේ ජීවිතය පුරා ඇදීගිය සිනමා ආසක්තය ‘කිරුළු පැළඳි’ මොහොත ලෙස මට සිතිණි. "සිංහල සිනමා සංරක්ෂක" තිස්ස නාගොඩවිතාන මහතාගේ ප්‍රධාන අනුග්‍රහකත්වයෙන් 1959 සිට දශකයෙන් දශකය ගාමිණී ගේ සිනමා රංගනය විකාශය වූ විලාසය විදහා දැක්වුණු ප්‍රත්‍යාවලෝකන සිනමා දැක්මක්ද සමග ඔහු ගේ සිනමා දිවියෙහි අතිශය ජනප්‍රිය වූ ගීත රාශියක් ප්‍රතිනිර්මාණය කර නූතන රංගන ශිල්පීන් විසින් වේදිකාව මත ඉදිරිපත් කෙරුණු එම ප්‍රසන්න වූද උත්කර්ශවත් වූද රාත්‍රියෙහි ඔහුගේ සිනමා දිවියට අදාල තවත් ග්‍රන්ථ දෙකක්ද එළිදැක්විණි. මැදියම් රැයද පසුවනතෙක් ප්‍රහර්ෂය රැදුණු එය සැබවින්ම සිනමා සක්විති සිනමා දිවියෙහි අවසන් උත්කර්ෂවත්ම රාත්‍රිය විය.