တမူးနဲ့ ခမ်းပါတ်မြို့ကြား တိုက်ပွဲဆက်ပြင်းထန် | People's Spring

တမူးနဲ့ ခမ်းပါတ်မြို့ကြား တိုက်ပွဲဆက်ပြင်းထန် ဇူလိုင်-၃၊ ၂၀၂၆။ People's spring စစ်ကိုင်းတိုင်း၊ တမူးနဲ့ ခမ်းပါတ်မြို့ကြားမှာ တိုက်ပွဲဆက်ပြင်းထန်နေပြီး စစ်တပ်က လေကြောင်းကနေ ဗုံးကြဲလို့ အရပ်သားအချို့သေဆုံးမှုရှိတယ်လို့ ဒေသတွင်းသတင်းရင်းမြစ်တွေက ပြောပါတယ်။ ဒါ့အပြင် စစ်တပ်စစ်ကြောင်းက အရပ်သားအချို့ကိုလည်း ဖမ်းဆီးသတ်ဖြတ်နေတယ်လို့ သိရပါတယ်။ တော်လှန်ရေးတပ်တွေ ထိန်းချုပ်ထားတဲ့ အိန္ဒိယ-မြန်မာကုန်သွယ်ရေးလမ်းကြောင်းကို နယ်မြေစိုးမိုးမှုပြန်ယူမယ်ဆိုပြီး ပြီးခဲ့တဲ့ ဇွန်လဆန်းက အိန္ဒိယခရီးစဥ်မှာ စစ်ခေါင်းဆောင်မင်းအောင်လှိုင်က ပြောဆိုခဲ့ပြီးနောက်ပိုင်း ကလေး-ခမ်းပါတ်-တမူးလမ်းပိုင်းအတိုင်း စစ်တပ်စစ်ကြောင်းတွေ ဝင်လာလို့ တိုက်ပွဲတွေ ဖြစ်နေတာပါ။ ဇွန်လလယ်က တိုက်ပွဲတွေအတွင်း ခမ်းပါတ်မြို့ကို စစ်တပ်က ထိန်းချုပ်ခဲ့ပေမယ့် တိုက်ပွဲတွေဆက်ဖြစ်နေသလို လေကြောင်း ဗုံးကြဲမှုနဲ့ အရပ်သားတွေကို ဖမ်းဆီးသတ်ဖြတ်မှုတွေရှိနေတယ်လို့ စစ်ဘေးရှောင်နေရတဲ့ ဒေသခံတွေက ပြောပါတယ်။ စစ်တပ်က အရပ်သားတွေကို ပစ်မှတ်ထားနေတယ်လို့ ဒေသခံတစ်ဦးက ပြောပါတယ်။ ဇွန်လနှောင်းပိုင်းမှာ အရပ်သားတချို့ ဗုံးကြဲခံရမှုကြောင့် သေဆုံးရသလို ဖမ်းဆီးသတ်ဖြတ်ခံရတာလည်း ရှိတယ်လို့ အဲဒီဒေသခံက ဆိုပါတယ်။ ဒါ့အပြင် ပျောက်ဆုံးနေတဲ့ အရပ်သားအချို့လည်းရှိနေပြီး ဘေးကင်းစိတ်ချရတဲ့ နေရာအထိ ရှောင်တိမ်းကြဖို့ တော်လှန်ရေးတပ်တွေက သတိပေးထားပါတယ်။ လက်ရှိဒေသတွင်း စစ်ရေးအခြေအနေကြောင့် ကလေး-ခမ်းပါတ်-တမူး ကားလမ်းမဘေး ကျေးရွာတွေဖြစ်တဲ့ ရန်မျိုးအောင်၊ စော်ဘွားရေရှင်၊ ကျွန်းတော့ရေရှင်၊ နန်ကတိတ်၊ နန်မွန်းတားနဲ့ ခွန်မွန်းနွမ်ကျေးရွာအပြင် ကျေးရွာ ၁၀ရွာထက်မနည်းက ဒေသခံတွေ ထွက်ပြေးတိမ်းရှောင်နေကြရတယ်လို့ သိရပါတယ်။ တိုက်ပွဲတွေအတွင်း စစ်တပ်က‌ သေဆုံးမှုများနေတယ်လို့လည်း သိရပါတယ်။ တမူးမြို့နယ်က ဝိတုပ်ကျေးရွာမှာ ဇွန်လ ၁၅ရက်ကနေ ဇွန်လ၂၃ရက် တိုက်ပွဲအတွင်း စစ်တပ်က တပ်ရင်းမှူးအပါအဝင် သေဆုံးသူ ၂၀ဦးထက်မနည်း ရှိခဲ့တယ်လို့ တော်လှန်ရေးတပ်ဖွဲ့ဝင်တွေက ဆိုပါတယ်။ ကလေး-ခမ်းပါတ်-တမူးလမ်းပိုင်းဟာ အိန္ဒိယ–မြန်မာ–ထိုင်း သုံးနိုင်ငံချိတ်ဆက်မယ့် အဝေးပြေးလမ်းမကြီးမှာ ပါဝင်ပါတယ်။ စစ်တပ်က ခမ်းပါတ်မြို့ကို ကလေးနဲ့ တမူးမြို့ဘက်ကအပြင် မော်လိုက်မြို့ကနေပါ စစ်ကြောင်းသုံးကြောင်းခွဲပြီး ဝင်လာခဲ့တာကြောင့် ဇွန်လ ၈ရက်ကတည်းက တိုက်ပွဲတွေဖြစ်ခဲ့တာပါ။ လက်ရှိမှာတော့ ခမ်းပါတ်မြို့ထဲမှာ စစ်တပ်စစ်ကြောင်းတွေရှိနေပြီး လေကြောင်းတိုက်ခိုက်မှုတွေနဲ့ မြေပြင်စစ်ကြောင်းထိုးမှုတွေ ဆက်ရှိနေတယ်လို့ သတင်းရရှိပါတယ်။ ===== နေပြည်တော် PDFရဲ့ ဇွန်လစစ်ဆင်ရေး စစ်တပ် ၄၀ ကျော် သေဆုံး ဇူလိုင်-၃၊ ၂၀၂၆။ People’s Spring ပြည်သူ့ကာကွယ်ရေးတပ်မတော်(PDF)နေပြည်တော်တိုင်းစစ်ဌာနရဲ့ စစ်ဆင်ရေးဖော်ဆောင်မှုတွေကြောင့် ဇွန်လအတွင်းမှာ စစ်တပ်က အရာရှိ ၄ဦး အပါအဝင် ၄၀ဦးကျော် သေဆုံးခဲ့တယ်လို့ သတင်းထုတ်ပြန်ပါတယ်။ အဲဒီစစ်ဆင်ရေးအတွင်း စစ်တပ်လက်အောက်ခံ ရဲစခန်းမှူး အပါအဝင် အများအပြား ထိခိုက်ဒဏ်ရာရခဲ့တယ်လို့လည်း နေပြည်တော် PDFက အသိပေးပါတယ်။ ဇွန်လအတွင်း နေပြည်တော်တိုင်းစစ်ဌာနရဲ့ စစ်ဆင်ရေးနယ်မြေတွေ ဖြစ်တဲ့ ပဲခူးတိုင်း ဆွာမြို့နဲ့ ရေတာရှည်မြို့နယ်တွင်းက စစ်တောင်းမြစ်အရှေ့ဘက်ကမ်း စစ်ခွင် နဲ့ မကွေးတိုင်း အောင်လံ၊ တောင်တွင်းကြီး၊ နတ်မောက်မြို့နယ်တွင်းက အလယ်ရိုးမစစ်ခွင်တွေမှာ စစ်ဆင်ရေးဖော်ဆောင်ခဲ့တာဖြစ်ပါတယ်။ တစ်လအတွင်း စစ်ဆင်ရေးတွေမှာ စစ်တပ်ဆီက လက်နက်ငယ် (၁၈)လက်နဲ့ ကျည်ခဲယမ်းတွေ၊ ဆက်စပ်ပစ္စည်းတွေ သိမ်းရခဲ့ကြောင်းလည်း မှတ်တမ်းနဲ့အတူ အသိပေးပါတယ်။ အဲ့ဒီ စစ်ဆင်ရေးအတွင်း ဇွန်လ ၃ရက်မှာ ဆွာမြို့နယ် ဆွာမကြီးရွာစခန်းကို တိုက်ခိုက်သိမ်းပိုက်နိုင်ခဲ့ပြီး ဇွန် ၄ရက်မှာတော့ နတ်မောက်မြို့နယ် အရှေ့ခြမ်းက ကွင်းကြီးကျေးရွာအနီး စိုင်ကောင်းရဲစခန်းမှူးလိုက်ပါလာတဲ့ ယာဉ်တန်းကို မိုင်းဆွဲတိုက်ခိုက်မှုတွေ လုပ်ဆောင်နိုင်ခဲ့တယ်လို့ သိရပါတယ်။ ဒါ့အပြင် စစ်တပ် တပ်စွဲထားတဲ့နေရာတချို့၊စစ်တပ်ယာဉ် နဲ့ ရေတာရှည်မြို့နယ် ကျေးရွာတချို့ဆီ ဝင်ရောက်လာတဲ့ စစ်တပ်စစ်ကြောင်းတွေကို ခုခံတိုက်ခိုက်ခဲ့တယ်လို့ ဖော်ပြထားပါတယ်။ အဲဒီစစ်ဆင်ရေးတွေကို နေပြည်တော်တိုင်းစစ်ဌာန၊ ဗျူဟာအမှတ်(၁၇)၊ (၁၈)နဲ့ (၁၉)လက်အောက်က PDF တပ်ရင်းတွေ၊ နေပြည်တော်ပကဖ၊ ရိုးမဖိုက်တာစစ်ကြောင်းနဲ့ မဟာမိတ်တပ်ဖွဲ့တွေက ဖော်ဆောင်ခဲ့တာ ဖြစ်ပါတယ်။ ရေတာရှည်မြို့နယ်တိုက်ပွဲမှာ စစ်တပ်က ထိခိုက်သေဆုံးများလို့ ဒရုန်း၊ လက်နက်ကြီး၊ တင့်ကား၊ Y 12၊ MI 35 နဲ့ ဂျက်ဖိုက်တာတွေ သုံးပြီး တိုက်ခိုက်တာတွေရှိတယ်လို့လည်း ဆိုထားပါတယ်။ စစ်ဆင်ရေးအတွင်း PDF တပ်ဖွဲ့ဝင်တွေ ထိခိုက်ကျဆုံးရှိမရှိ အခြေအနေတွေကိုတော့ ဖော်ပြမထားပါဘူး။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #MyanmarCoup #Tamu #Khampat #PeoplesSpring #BreakingNews #တမူး #ခမ်းပါတ် #ပြည်တွင်းသတင်း #စစ်ရေးသတင်း #MyanmarCoup #NayPyiTawPDF #MilitaryOperation #နေပြည်တော်PDF #စစ်ရေးသတင်း #ပြည်တွင်းသတင်း #ဇွန်လစစ်ဆင်ရေး