ودعني وارتاح - باسم الكربلائي

قصيدة : وَدِعـنـي وارتاح أداء : باسم الكربلائي الكلمات : الشاعر السيد عبدالخالق المحنه كلمات القصيدة وَدِعـنـي وارتـاح يَالْماخِذ عيوني ... حتّى الدّمِع رآح ويّا الـْيِودعوني نــار الــهَــجُــر نــار ... وبِــروحــي مِـسـمـار مو كِل مَن يِروح الرّوح تِمشي وياه ... ولا كِل مَن يِغيب إنِصيح منْ فَرگاه أَخـذتْ وياك گلبي وگلبي وينْ أَلگاه ... يا جَرح الأَذِكرَه ويا جَرِح اَنساه والـضِـلـعَه مَگسور ونّاتَه مَسموعَه ... وانگِلّه مَعذور منْ يِجرَن ادموعَه أصــبُــر عــلــى الـصـار ... وبِـروحـي مِـسـمـار تَعال الرّوح عِطشَتْ رادَت تِشوفَك ... تَعال چفوفي حَنّتْ شوگ لِچفوفَك عِـفتني بليلَه وَحشة وتِدري ما عوفَك ... يا كعبَة مُصابي ودَمعتي تِطوفَك آه إِمـنِ الأيّـام جِـرحتني بِالغالي ... كِل عُمري آلام والدّمعه تِحلى لي مــا عِــنــدي أَنــصــار ... وبِـروحــي مِـسـمـآ أَنـا بِـعـيـنـي أَشاهِد دَمعك اتهِلّه ... وَجهَك يِنصُطر گِدام أَبو الحَملَه سُـكـوتي إِبهَالوَضِع يا ناس مو سَهلَه ... أَسِل سيفِ الصّبر بتّاري ما أَسلّه مرّه انظُر إِعليك مرّه انظُر اوليدي ... والسّكتَه تآذيك بَس ما يِصحُ بيدي شِــتِــفــيــد الأَعــذار ... وبِــروحـي مِـسـمـآر أَگـلّـك روح عَـنّـي وإسـتِـراح انتَ ... أَنا گلبي على التّوديع علمتَه كَـم صـاحـب قَـبُل هَاليوم وَدّعتَه ... أظَل لِلبير أَسولِف قِصتي سَكتَه يَـالرايِد اتِروح وياك إِخذ روحي ... تِتركني مَجروح يا أَصعب جروحي دار الــزّمــن دار ... وبِـروحــي مِـســمـآر أَرِد لِـلـدّار حّـتـى أتـذَكّر أَيامَك ... أنَه مِضيّع وأَدوّر أَثر لِچدامَك أَشـوف الـباب يِرسِم صورَة آلامَك ... بَعد عينِ المِشوا يا ليل ما نامك يـا نـايِـم الـلّيل خلّيني بِهمومي ... أَسهَر على الويل منْ فارگت نومي خــلّــيــنــي مِــحـتـار ... وبِـروحـي مِـسـمـآر عَـجَب يا بو الوِفه ما تِذكر أَحبابَك ... تَعال وشوف حالي شلون بِغيابَك وحَـقّگ مـا يِبس منْ مَدمَعي إتِرابَك ... يَغالي وما يِفيد إِعتابي وإِعتابَك انـتَـظـرَك تِـعـود يَـالبِلگبُر نايِم ... يا أَغلى مَفگود بيك الگلُب هايِم مَــشــغــولَــه بَـأَفـكـار ... وبِـ روحـي مِـسـمـآر بِـلـيلِ أَظلَم دِفنتَك وإندِفن صَبري ... أُبو الحَملات آني وانكِسر ظَهري أَنَـه إِسهام المُصايِب يِغفَن إِبْصَدري ... إِذا زينَب تِوِن دَمعِ الحَسن يِجري مـنْ يِبچي الحسين شيصبرَه شيصبرَه ... وين الصّبر وين ما تِنطفي الجَمرَه مــنْ يــآخِــذ الــثّــار ... وبِـروحــي مِـسـمـآر