Pentecostal Cawnpiaknak Hmaan Lo Kong - Rev. Hoi Cung Tum

Pentecostal Pentecostal kan ti tikah an tuahmi a hmaan lomi kha kan doh bik mi cu an si. A ngaite ti ahcun Pentecostal ah hin piangthar an tampi ko. Lamkaltu chan bantuk in Thlarau riantuannak a um rih tiah an zumh caah, cu an zumh ning te cun an kal. Nihin ahcun Bible tling tein kan ngeih cang caah Pathian Bia Bible caan a si. Cucaah an hmaan lo kan ti ngamnak cu Bible hi thianghlim tein kan i tlaih caah a si. Cucu kanmah tuahmi a hmaan bik tinak caah si loin Bible ah a um lomi an tuah lengmang ca tu ah a si deuh. Hlan deuh ah a lar bak mi cu Liberal hi a si. An piangthar lo. Tu tiang zong an tam tuk rih nain atu lio ahcun Pentecostal hi a laar bik mi a si. Vawlei pumpi huap in an linhsat tuk lio a si caah mipi cu kan kalning aa khah peng caah tilian nih a kan hah, a kan fenh lengmang. Cucu kan doh peng mi cu a si. Minung kan si caah kan tling lai lo. Asinain a hmaan lomi cawnpiaknak le zumhnak hmaan lo kalpi hi mipi nih an din, an ei, an i lak bik mi a si caah Pathian he an i tonnak tiang a donh hna, mi an phenh hna. Cucaah Jesuh le lamkaltu zong nih an huat ngaimi cu cawnpiaknak hmaan lo le zumhnak hmaan lo hi a si caah, Liberal an si ah, Pentecostal an si ah mipi ruunvennak caah kan doh zungzal hna nak cu an si. Thawngtha karhnak rian ah kan si khawh tawk cio in, thawngtha kan chim pah lai, thla kan cam pah, cun cawnpiaknak hmaan lo le zumhnak hmaan lo kan do pah lai. Cawnpiaknak hmaan lo le zumhnak hmaan lo cu kan nun chung Bawipa nih a rem a ti ahcun kan doh zungzal ding mi rian sunglawi a si. Bible biatak dirpi cu cawnpiak hmaan lo le zumhnak hmaan lo a dongh lawnglawng ah i dinh ding mi rian a si.