Ahmeti: Siguria e protestës mbështetet te qytetaria. Goci: Dorëheqja e Ramës emergjencë kombëtare

Protesta për dorëheqjen e kryeministrit Edi Rama ka hyrë në ditën e saj të 37-të, ndërsa nga ana tjetër qeveria ka bërë të ditur se po shqyrton kërkesat e paraqitura nga qytetarët. Pavarësisht këtij zhvillimi, organizatorët deklarojnë se qëndresa do të vijojë deri në realizimin e kërkesës kryesore. I ftuar në MCN Informacion, ish-oficeri i Policisë, Krenar Ahmeti, u shpreh se protesta ka ruajtur karakterin e saj paqësor falë qytetarisë së pjesëmarrësve dhe bashkëpunimit me institucionet e sigurisë. Ai theksoi se organizatorët janë të vetëdijshëm se në çdo protestë mund të ketë individë që tentojnë të provokojnë incidente, por sipas tij, raste të tilla nuk përfaqësojnë protestuesit. Ndërsa pedagogu Ervin Goci deklaroi se protesta nuk ka një listë kërkesash, por vetëm një kërkesë themelore, të cilën e cilësoi si “emergjencë kombëtare”. Sipas tij, dorëheqja e kryeministrit është e vetmja zgjidhje për situatën aktuale, ndërsa argumentoi se të gjitha problemet e tjera që i kanë nxjerrë qytetarët në protestë janë pasojë e mënyrës së qeverisjes. Ai ndaloi edhe te shpenzimet për rikonstruksionin dhe arredimin e godinës së Kryeministrisë, të cilat i konsideroi të papranueshme në një kohë kur, sipas tij, qytetarët përballen me vështirësi ekonomike dhe sociale.