Seydəpir ocağı, Lənkəran (Şağlaküçə kəndi)

SEYDƏPİR OCAĞI. Lənkəran-Lerik şose yolunun sol tərəfində, Şağlakücə kəndinin ərazisində yerləşir. Kənd sakinlərinin qənaətinə görə,  yaranması XIV-XV əsrlərə təsadüf edən bu ocaq, əslən Gilan mahalından olmuş  Seydəpir  adlı seyidin adı ilə bağlıdır. Ocaq Seydəpir  şəxs adı ilə bağlı deyildir. Seydəpir talış dilində “seyd” – seyyid, “ə” -  birləşdirici səs və fars dilində “pir” – ziyarətgah  sözlərinin birləşməsindən yaranaraq,  Azərbaycan dilinə tərcümədə “Seyid ziyarətgahı” mənasını verir. Burada dəfn edilən və adı bizə məlum olmayan şəxs təqvalı, kəramətli seyid olduğundan qəbri ziyarətgaha çevrilərək Seydəpir adlandırılıb. Bu gün ocaq ərazisində ziyarət olunan qəbirdən başqa qəbir olmasa da, çox güman ki, ocaq ərazisi keçmişdə qəbristanlıq olub. Düzən ərazidə yerləşən Seydəpir ocağı geniş əraziyə malikdir. Burada çoxlu sayda çoxillik  tarixi olan nəhəng palıd və nil (azat) ağacları var. Ziyarətgah ərazisində quyu qazılmış, ziyarətçilərin günəş şüalarından  və yağışdan daldalanması üçün tikili inşa edilməklə, dini ayinlərin icra edilməsi üçün  hər cür şərait yaradılıb. Şağlakücə kənd sakinləri Kərbəlayi Cankişi Yüzbaşı oğlu Fərəcov və Əlihəsən Şahab oğlu Kərimovun şəxsi vəsaitləri hesabına qəbir üstündə böyük məqbərə inşa edib. Ocağa müxtəlif yerlərdən insanlar ziyarətə gəlir, xüsusilə Məhərrəmlik və Ramazan aylarında ziyarətçilərin sayı daha çox olur. Seydəpir təkcə dini yox, həm də tarixi abidədir. Burada  Seyid piri (Seydəpir-İ.Ş) adlandırılan  kurqan aşkar edilib. İldırım Şükürzadə "Lənkəran ziyarətgahları"