عشر نقاط للنجاح في مهنة المحاماة

لكل محامي عايز يبدأ مشواره صح ، خلي بالك من النصايح اللى هنقولها دي كويس جدا ، لأننا في الفيديو ده هنخليك تحط رجلك على 10 خطوات هتكون بإذن الله بداية نجاحك في مهنة المحاماة . أنا حسام شبل والنهاردة هنتكلم عن 10 نقاط للنجاح في مهنة المحاماة أول حاجة / اختار المحامي اللى هتدرب عنده كويس، والافضل ميكونش عنده مدير مكتب عشان يكون تعامله معاك مباشرة ، وعشان تفهم منه طريقة استنباط الأدلة ، وكمان يكون عدد المحامين في مكتبه ما يزيدش عن 10 محامين عشان تضمن انه يكلفك بعمل يومي من خلاله يكون عندك فرصة انك تروح جميع المحاكم وتعرف دوائرها ومسميات القضايا. تاني حاجة / الصبر في بداية الطريق لأن المحامي تحت التدريب بيكون عنده طموحات كبيرة وطاقة عالية واندفاع نحو الترافع في القضايا ، لكنه مش بيحصل على الفرصة إلا بعد تدريبه بشكل كافي يضمن أنه أصبح كفئ للعمل. تالت حاجة / المظهر اللائق كمحامي ( مظهر المحامي ولباقته في الأسلوب بيخلي الجميع يقف احتراما له ) والمظهر له دور في التأثير واٌلإقناع حتى ان كليات الطب بتدرس كيفية الظهور أمام المريض لإقناعه ، وكمان معاهد القضاء بتهتم بتعليم وكيل النيابة المظهر قبل ما تعلمه ازاي يحقق في القضية. رابع حاجة / افكر في انك تأسس مكتب خاص حتى في بيتك بعد فترة التدريب جنب شغلك في مكتب المحاماة، لأن ده بداية طريق النجاح (فديما خلي مكتبك الخاص هدفك الأساسي في التفكير ) . خامس حاجة / اثقل نفسك علميا في مهنتك وفي مجال المحاماة، وافضل بداية الالتحاق بدبلومات الدراسات العليا عشان تأهل نفسك للحصول على الماجستير والاطلاع على الإصدارات القانونية الجديدة . سادس حاجة / خليك ديما متعاون مع كل المحامين لأن سمات نجاح مهنة المحاماة العلاقات بين المحامين بشكل كبير، وده طبعا بيوفر فرص التعاون معاهم بمقابل ، واعطي كل شخص الكرت الشخصي عشان يكون وسيلة أعلانية لك اما أي حد يحتاجك. سابع حاجة / حاول دايما أنك تدخر حاجة من دخلك حتى لو كان قليل شارك بيه في ( جمعية أو استثمره مع شخص بتثق فيه) وصدقني في يوم من الايام هتلاقي المبلغ ده مناسب انك تشتري بيه عربية أوتحتاج بس انك تضيف عليه مبلغ بسيط تاني وتدفعه في مقدم شقة . تامن حاجة / خليك ديما متواضع مع الناس واسمع لهم كويس وساعد غير القادرين على دفع الأتعاب، وادعم شباب المحامين المتدربين عندك ولو بقليل مما تملك. تاسع حاجة / ما تاخدش أي قضية تتعرض عليك ، اتعامل بس مع القضايا السليمة اللي فيها الحق ، واللي تشعر أن عملك فيها هو إعادة الحق لصاحبه، وابعد عن القضايا اللى تسيء لك ولسمعتك مهما كان المقابل حتى لو كنت في بداية حياتك . آخر حاجة / خليك ديما واثق في نفسك طالما شايف نفسك انك على حق مهما كانت قوة الدفاع اللي امامك ، واعرف ان خصمك ضعيف هش مادام بيترافع في قضية باطل ، ودايما ماتحولش الاقتراب من المحامين الكبار اقصد المحامين اللي بينظروا إلى غيرهم نظرة ازدراء ، لان محاولة تقربك منهم تعني انك ضعيف، وخليك واثق ان ربنا وحده هو اللي هيساعدك مادمت على حق. يارب نكون قدرنا نقدم معلومات تفيد الجميع. (الفيديو برعاية shebllawfirm) #مهنة_المحاماة #حسام_شبل