Xhamia e Madhe - Çarshia e Epërme - Tetovë 2025

HATME NË XHAMINË E MADHE NË TETOVË Sot e shtunë, me datë 28.06.2025, në Xhaminë e Madhe në Tetovë, u organizua manifestim solemn me rastin e përfundimit të leximit të plotë të Kur’anit Famëlartë – hatme, nga nxënësit të mektebit të kësaj xhamie, të cilët u përgatitën në nivel të lartë nën udhëheqjen e mualimes hfz. Sanida Hismani Dauti. Në këtë manifestim madhështor, përveç prindërve, familjarëve dhe dashamirëve të fjalës së Zotit, morën pjesë Myftiu Dr. Hfz. Selver Xhemaili, me kolegë nga Myftinia e Tetovës, drejtori i sektorit për shkencë dhe kulturë, Mr. Musanif ef. Rufati, drejtori për diasporë, Mr. Mafiz ef. Rustemi, profesorë dhe imamë të rrethit, si dhe shumë besimtarë qyteti dhe më gjerë. Në fjalën përshëndetëse, Myftiu i Tetovës vlerësoi lart përkushtimin e nxënësve dhe mualimes, duke theksuar rëndësinë e mektebit si themel i edukimit fetar dhe moral të brezave të rinj. U përmend se përgatitja e nxënësve në një nivel kaq të lartë është dëshmi e punës së palodhur, përkushtimit të sinqertë dhe përkujdesjes së vazhdueshme për cilësinë e mësim-besimit. Duaja e hatmes u bë nga referenti i Myftinisë Idris ef. Idrizi, ndërsa programin e moderoi sekretari Semir ef. Fazliji. Pas përfundimit të programit të përgatitur me përkushtim, u shpërndanë diplomat për të gjithë nxënësit që përfunduan hatmen, ndërsa për mualimen Sanida Hismani Dauti, u nda mirënjohje e veçantë si shenjë falënderimi për angazhimin e saj të sinqertë dhe profesional. Mirënjohjen e pranoi bashkëshorti i saj, njëherit imami i xhamisë, hfz Resi ef. Dauti. Zoti i bekoftë këta të rinj me dituri të dobishme dhe vepra të mira, dhe e shpërbleftë mualimen me të mirat e Tij në dynja dhe ahiret. Falënderime të veçanta i drejtohen gjithashtu imamit, këshillit të xhamisë dhe të gjithë kontribuesve që ndihmuan në realizimin e këtij manifestimi të paharruar.