സ്വപ്നങ്ങളും ആഗ്രഹങ്ങളും സ്വരുക്കൂട്ടിപ്പണിത പ്ലാക്കുറിശ്ശി ഇല്ലം

സ്വപ്നങ്ങളേയും ആഗ്രഹങ്ങളേയും സ്വരുക്കൂട്ടിയാണ് ഫോർട്ട്കൊച്ചി പാണ്ടിക്കുടിയിലുള്ള വേണു വീടു പണിക്കിറങ്ങിയത്. അത് വെറും ഒരു വീടല്ല.. വരിക്കാശേരി മനപോലെ തലയെടുപ്പുള്ള വാസ്തു വൈദഗ്ധ്യത്തിന്റെ മകുടോദാഹരണമെന്നു വിശേഷിപ്പിക്കാവുന്ന തടിയിൽ മാത്രം തീർത്ത ഒരു മൂന്നു നില വീട്. അതും ആറുസെന്റ് സ്ഥലത്ത്. കേരളീയത്തനിമയുടെയും കൊത്തുപണികളുടെയും ദൃശ്യവിസ്മയമാണ് പ്ളാക്കുറിശ്ശി ഇല്ലം എന്ന് പേരിട്ടിരിക്കുന്ന ഈ വീട്. കേരളത്തിന്റെ വിവിധ ഭാഗങ്ങളിൽനിന്നു പൊളിച്ചുകൊണ്ടുവന്ന മരഉരുപ്പടികളെ അളനും കണക്കും തെറ്റാതെ ആറുസെന്റിനുള്ളിൽ ഒരു വീടാക്കി എടുക്കാൻ വേണുവിന് കൂട്ടിന് ഒരു ആർക്കിടെക്ടുമുണ്ടായിരുന്നില്ല. ഒരു സൈക്കിൾ വർക്ക്ഷോപ്പുകാരൻ മാത്രമായ വേണുവിന് ഈ വീടുപണിക്ക് കയ്യിലുണ്ടായിരുന്ന സർട്ടിഫിക്കറ്റ് ആത്മവിശ്വാസത്തിന്റെ മാത്രമായിരുന്നു.