Arrestohet në Durrës ish-anëtari i bandës së Gaxhait, raporton gazetarja Enkeleda Arapi

#Çipuri #arrestim #durres #bangagaxhait Armando Sulejmani, ish-anëtari i bandës famëkeqe të Gaxhait, është vënë në pranga nga policia e Durrësit. Gazetarja Enkeleda Arapi raporton se ai u ndalua mbrëmjen e së mërkurës, teksa lëvizte me makinë, e cila rezultoi me targa të vjedhura. Sipas policisë, makina me të cilën lëvizte Sulejmani, i njohur me nofkën “Çipuri”, dyshohet se mund të përdorej për kryerjen e ngjarjeve kriminale. “Bazuar në informacionet e siguruara nga inteligjenca informative, për një shtetas që qarkullonte me një automjet me targa të vjedhura, që mund të përdorej për kryerjen e ngjarjeve kriminale, u organizua dhe finalizua operacioni policor i koduar “Zëvendësimi”, për kapjen e këtij shtetasi dhe sekuestrimin e automjetit. Gjatë operacionit, në Spitallë, shërbimet e Policisë i kanë bërë shenjë ndalimi automjetit tip “Mercedes Benz”, me drejtues Armando Sulejmanin, i cili nuk i është bindur urdhrit për të ndaluar dhe ka tentuar të largohet me shpejtësi. Si rezultat i veprimeve të shpejta policore u kap Armando Sulejmani dhe u shoqërua në Komisariat, për veprime të mëtejshme. Nga veprimet hetimore rezultoi se targat e automjetit tip “Mercedes Benz”, që drejtonte ky shtetas, ishin të vjedhura dhe i përkisnin një automjeti tip “Land Rover”, i vjedhur më datë 03.11.2023, në Tiranë. Gjatë kontrollit në bagazhin e automjetit tip “Mercedes Benz”, janë gjetur targat origjinale të këtij automjeti. Në përfundim të veprimeve të para procedurale për këtë rast, u arrestua në flagrancë Armando Sulejmani, 48 vjeç, banues në Vlorë, i dënuar më parë për vrasje. Gjithashtu, u shpall në kërkim shtetasi L. Z., 26 vjeç, banues në Tiranë, pronar i automjetit që drejtonte 48-vjeçari, i dyshuar si bashkëpunëtor në vjedhjen e automjetit tip “Land Rover”. Automjeti tip “Mercedes Benz”, targat e tij dhe targat e vjedhura u sekuestruan në cilësinë e provës materiale, bashkë me një kaçavidë dhe 3 celularë”, tha policia e Durrësit në një njoftim për mediat. Armando Sulejmani është personazh i njohur si për policinë, i dyshuar e akuzuar në disa ngjarje kriminale. Ai po ashtu i ka shpëtuar të paktën 2 atentateve deri më tani. Në 2019-n, Sulejmani i shpëtoi një atentati në Vlorë. Në këtë rast nga të shtënat mbetën të vrarë Arjan Hasani dhe Orest Rexho. “Çipuri”, i cili dyshohej se ishte dhe objektivi i këtij atentati, mbeti i plagosur. Për këtë ngjarje 48-vjeçari u arrestua për armëmbajtje pa leje, pasi u zbulua se kishte me vete armë zjarri (Lexo më shumë). Ndërsa në vitin 2016, ai i shpëtoi një tjetër atentati pranë shtëpisë në lagjen “Pavarësia” të Vlorës. Edhe në këtë rast ai mbeti i plagosur. Në atë kohë, Sulejmani sapo kishte dalë nga burgu, pasi kishte përfunduar dënimin për një vrasje. Banda e Gaxhait në Vlorë veproi gjatë 1997-ës dhe mbi anëtarët e saj rëndonin akuza për vepra kriminale si mbajtje e mjeteve luftarake, vrasje, pengmarrje, gjobëvënie. Në vitin 2002, Sulejmani u dënua me 20 vite burg për akuzën e vrasjes. Ai u shpall fajtor nga Gjykata e Apelit për vrasjen e Robert Borakut, po në 2002-n, vendim që u la në fuqi më pas nga Gjykata e Lartë./tvklan.al SUBSCRIBE to "RTV KLAN" on YouTube for more videos! Për më shumë informacione vizitoni faqen tonë web https://tvklan.al/kategoria/klan-news/ Follow Klan News on Facebook:   / klannews   Follow @klannews on Instagram:   / tvklannews   #KlanNews #KlanNewsLajme #TvKlan