ബാലരാമപുരം - കൈത്തറിയുടെ ഈറ്റില്ലം. Balaramapuram Kaithari - Balaramapuram - Trivandrum.

കേരളത്തിലെ തിരുവനന്തപുരത്തിനടുത്തുള്ള ബാലരാമപുരം കൈത്തറിയുടെ ഈറ്റില്ലം എന്നറിയപ്പെടുന്നു. തിരുവിതാംകൂര്‍ രാജകൊട്ടാരത്തിലേക്കു തുണിത്തരങ്ങള്‍ നെയ്യുന്നതിന് ശാലിഗോത്രര്‍ ബാലരാമപുരം കുടിയേറിയതെന്ന് പറയപ്പെടുന്നു. ഭൂമിശാസ്ത്ര ലക്ഷണ (ജ്യോഗ്രഫിക്കല്‍ ഇന്‍ഡിക്കേഷന്‍-ജി.ഐ.) നിയമപ്രകാരം ബൗദ്ധികസ്വത്തവകാശം ലഭിച്ച കേരളത്തിലെ ആദ്യ കൈത്തറി ഉത്പന്നമാണ് ബാലരാമപുരം കൈത്തറി സാരി. പ്രകൃതിദത്തമായ രീതിയില്‍ പരുവപ്പെടുത്തിയെടുക്കുന്ന ഗുണനിലവാരമേറിയ നൂലാണ് കൈത്തറിനെയ്ത്തിനായി ഉപയോഗിക്കുന്നത്. കഴിനൂല്‍ കോര്‍ത്തു കെട്ടി ചവിട്ടി നനച്ച് പാകപ്പെടുത്തുന്നു. അതിനെ അരടില്‍ ചുറ്റി താരാക്കി റാട്ടില്‍ ചുറ്റി പാവാക്കുന്നു. ഈ പാവിനെ പാക്കളങ്ങളില്‍ നിവര്‍ത്തുവിരിച്ചുകെട്ടി അരിപ്പശ തേച്ച്, തേങ്ങയെണ്ണ തടവി, വെയിലും മഴയുമേല്‍ക്കാതെ പുലര്‍ച്ചെ ഉണക്കിയെടുക്കുന്നു. ഈ പാവില്‍ നെയ്‌തെടുക്കുന്ന വസ്ത്രങ്ങളാണ് ബാലരാമപുരം കൈത്തറിയുടെ പ്രത്യേകത. ഇവയ്ക്ക് ഒരു പ്രത്യേകമണവും മിനുസവും ഉണ്ടായിരിക്കും.