Përcjellja e kontingjentit "Eagle-7" në Afganistan

Paraditen e sotme, në ambientet e Batalionit të Forcave Speciale, të Forcës Tokësore, u zhvillua ceremonia e nisjes së kontingjentit "Eagle-7" në mision ISAF, në Kandahar, Afganistan. Në këtë ceremoni morën pjesë shefi i Shtabit të Përgjithshëm i FA gjeneralmajor Xhemal Gjunkshi, atasheu ushtarak i SHBA në vendin tonë, komandanti i Forcës Tokësore, gjeneralmajor Zyber Dushku, komandantët e forcave kryesore dhe atyre mbështetëse, drejtorë të drejtorive në SHPFA, etj. Të pranishmit në ceremoni i përshëndeti komandanti i Forcës Tokësore, gjeneralmajor Zyber Dushku, i cili vlerësoi këtë mision si një tjetër histori suksesi. "Batalioni i Forcave Speciale, si një strukturë e konsoliduar e Forcës Tokësore, përbën një repart elitë me kontribut të dukshëm në operacionet në interes të paqes. Vijimi i misioneve të kontingjenteve "Eagle", është treguesi më domethënës i shkallës së lartë të profesionalizmit që Forcat Speciale kanë treguar me vepra në vite, duke nxjerrë në pah vlerat më të mira të Forcave tona te Armatosura. Gjej rastin të falënderoj për këto arritje komandantin e BFS dhe stafin e tij", - ka theksuar gjeneral Dushku. Ceremonia e përcjelljes së "Eagle-7" ka vijuar me përshëndetjen e shefit të Shtabit të Përgjithshëm të FA, gjeneralmajor Xhemal Gjunkshi, i cili e vlerësoi si një moment shumë solemn, një traditë dhe simbol i burrërisë dhe trimërisë. "Ju me profesionalizmin e treguar në të gjitha misionet jeni krenaria e FARSH, ju do të shërbeni për 6 muajt e ardhshëm në operacionin e drejtuar nga NATO, në Afganistan, ku do të gjeni një përvojë të vyer dhe gjurmët më të mira të mundshme që kanë përcjellë kolegët dhe shokët tuaj, ushtarakë nga Forcat e Armatosura të Republikës së Shqipërisë dhe atyre të vendeve partnere, veçanërisht SHBA. Ushtarakët shqiptarë, pjesëmarrës në koalicionin më të madh të vendeve të NATO, në Kandahar, Afganistan, me profesionalizmin e lartë dhe eksperiencën e fituar janë vlerësuar maksimalisht nga komanda e ISAF dhe vendet partnere", - ka vlerësuar në fjalën e tij, gjeneral Gjunkshi. Shefi i Shtabit të Përgjithshëm i FA, gjeneralmajor Xhemal Gjunkshi i ka dorëzuar flamurin kombëtar komandantit të kontingjentit, major Pali Dakolli, i cili ka premtuar se efektivi i "Eagle-7" do ta përmbushë me nder dhe dinjitet misionin e caktuar. Forcat e Armatosura të Republikës së Shqipërisë në këtë mision përfaqësohen me një efektiv prej 50 vetësh të kompanisë së Aksioneve Speciale Ajrore, pjesë e Batalionit të Forcave Speciale. Misioni i kontingjentit "Eagle-7" do të jetë kryerja e detyrave luftarake si pjesë përbërëse e BFS, e cila operon në zonën e operacionit ushtarak në Kandahar, Afganistan.