BETIKA MBEYA TULIA MARATHON 2026 YAANZA RASMI KWA PRE-MARATHON

Mbeya, Tanzania — Maandalizi ya kuelekea mbio kubwa za BETIKA MBEYA TULIA MARATHON 2026 yameanza rasmi leo Aprili 25, 2026 kupitia uzinduzi wa mbio za awali Pre-Marathon, ikiwa ni sehemu ya kuelekea tukio kuu litakalofanyika Mei 15 hadi 26, 2026 mkoani Mbeya. Mashindano hayo yanayofanyika kwa msimu wa kumi (Season 10) yameendelea kupata umaarufu mkubwa nchini kutokana na mchango wake katika kusaidia maendeleo ya jamii, hususan kuboresha miundombinu ya elimu na afya. Akizungumza wakati wa uzinduzi huo, Ndg. Joshua Edward kutoka Kitengo cha Habari na Mawasiliano cha TULIA TRUST alisema Tulia Marathon si mashindano ya riadha pekee bali ni jukwaa la kuunganisha jamii katika kuleta maendeleo. “Tulia Marathon ni harakati ya kuleta mabadiliko chanya katika jamii, hasa katika sekta za elimu na afya ambazo ni msingi wa maendeleo ya taifa,” alisema. Wananchi na wadau mbalimbali wanahimizwa kujitokeza kwa wingi kushiriki na kuunga mkono tukio hilo linalotarajiwa kukutanisha washiriki kutoka ndani na nje ya nchi.