"Patı" satan şəxslərə qarşı genişmiqyaslı əməliyyat - Baku TV

"Patı" satan şəxslərə qarşı genişmiqyaslı əməliyyat - Baku TV Bakıda polis əməkdaşları tərəfindən narkotik vasitə və psixotrop maddələrin satışı ilə məşğul olan şəxslərin aşkarlanaraq məsuliyyətə cəlb olunmaları istiqamətində əməliyyatlar həyata keçirilib. Əməliyyatlar paytaxtın Xəzər, Nəsimi və Binəqədi rayonlarında baş tutub. “Patı”, “şüşə” adlanan metamfetamin, həmçinin narkotik vasitə olan heroinin satışı ilə məşğul olan şəxslərin tutulması istiqamətində həyata keçirilən tədbirlər zamanı Mərdəkan qəsəbəsində əvvəllər məhkum olunmuş Qəmbər Əliyev və onun qardaşları İmamverdi və Əliqəmə saxlanılıb. Onların qəsəbə ərazisindəki evlərinin həyətinə baxış zamanı çəkisi 27 kiloqram olan 35 ədəd çətənə kolu, evdən isə 5 qram marixuana, 29 qram heroin, 9 qram metamfetamin və metadon həbləri aşkarlanıb. Qəmbər Əliyev ifadəsində qardaşları ilə birgə narkotik vasitələrin satışı ilə məşğul olduğunu etiraf edib. Xəzər rayonunda keçirilən digər tədbirlər zamanı narkotik vasitələrin satışı ilə məşğul olan Emil Heydərov və onun şəbəkəsinə daxil olan 12 nəfər saxlanılıb. Araşdırma zamanı müəyyən edilib ki, Emil Heydərov müxtəlif yollarla əldə etdiyi narkotik vasitələrin Xəzər rayonu ərazisində bu şəxslərin köməyi ilə satışını həyata keçirib. Nəsimi rayonunda keçirilən əməliyyat-axtarış tədbirləri nəticəsində “Kubinka”, “Şamaxinka”, “Papanin” və digər ərazilərdə narkotik vasitələrin və psixotrop maddə olan metamfetaminin qanunsuz dövriyyəsi və satışı ilə məşğul olan daha 6 nəfər saxlanılıb. Əməliyyat zamanı əvvəllər məhkum olunmuş Əflatun Qəmbərov, Qurban Həsənov, Asif Məmmədli, Roman Həsənov, Tural Qarayev və Zeynal Rufullayev tutularaq istintaqa təqdim olunublar. Bu şəxslərin üzərlərinə və evlərinə baxış zamanı külli miqdarda hazır bükümlərdə satış üçün nəzərdə tutulan heroin, metamfetamin və elektron tərəzilər aşkar edilərək götürülüb. Onlar izahatlarında narkotik vasitələrin qanunsuz dövriyyəsi və satışı ilə məşğul olduqlarını etiraf ediblər. Binəqədi rayonunda keçirilən əməliyyat zamanı isə Binəqədi qəsəbəsində psixotrop maddələrin satışı ilə məşğul olan əvvəllər dəfələrlə məhkum edilmiş Ramil Quliyev saxlanılıb. Onun üzərinə və qəsəbə ərazisindəki evinə baxış zamanı 1 kiloqram 240 qram metamfetamin, 6 qram heroin və tiryək aşkarlanaraq götürülüb. Araşdırma zamanı onun rayon və ətraf ərazilərdən müxtəlif vaxtlarda 20-yə yaxın evdən oğurluq etdiyi də məlum olub. Ramil Quliyevin yaşadığı evə baxış zamanı oğurluq yolu ilə əldə etdiyi məişət əşyaları aşkarlanaraq maddi sübut kimi götürülüb. Faktlarla bağlı Cinayət Məcəlləsinin müvafiq maddələri ilə cinayət işləri başlanılıb, istintaq-əməliyyat tədbirləri davam etdirilir. Kanalın əsas məqsədi dünyada və ölkədə baş verən ən vacib və maraqlı xəbərləri azərbaycan və rus dillərində geniş auditoriyaya çatdırmaqdır. Baku.Tv ölkədə və dünyada baş verən ən aktual və maraqlı hadisələr barədə operativ videosujetlər hazırlayaraq auditoriyaya təqdim edir. Facebookda səhifəmiz:   / www.baku.tv     / __baku_tv__   https://baku.tv Kanalda bütün müəllif hüquqları qorunur. #BakuTv #Azerbaycan #trend