“Sərhədimiz bütöv olsaydı, düşünərdim oğlumun arzusu gerçəkləşib”

Abdullayevlər ailəsi masa arxasına toplaşıb. Oturacaqlardan biri isə həmişəlik boş qalıb. Ailənin ən kiçiyi – 22 yaşlı Sənan Abdullayev müharibədə həyatını itirib. “Mən hələ də onun yoxluğunu təsəvvür edə bilmirəm. O, gecələr də gəlir, mənimlə söhbət edir. Birdən mən doluxsunanda, qabağımda durur, mənə gülür ki, “Ata, mən gələcəm! Gələcəm, sənin fikirlərinin hamısını reallaşdıracam”. Yəni, Sənan verdiyi sözə əməl edən oğlandı...” Hərbi səfərbərliyə könüllü yazılan Sənan Abdullayev 1 okyabrda cəbhəyə aparılıb. 5-cə gün sonra isə Füzuli rayonu ərazisindəki gedən döyüşlərdə həyatını itirib. Neytral ərazidə qalan cansız bədəni noyabrın 1-də - elə onun doğum günündə tapılıb. Həmin vaxt Sənanın ad gününü qeyd edən ailəsinə isə səhvən onun sağ olması xəbəri çatıb. “Çox, çox sevinmişdim. Qurbanlar kəsildi, özüm aparıb payladım. Amma bilmirdim ki, balam ölüb”. “Noyabrın 1-i 22 yaşı tamam oldu. Özü olmasa da, biz hamımız yığışıb onun ad günün qeyd elədik. Onun zəngini gözləyirdik səbrsizliklə. Tək biz yox, bütün qohumlar... Biz onun zəngini sürpriz gözləyirdik. Həmin vaxt şəhid olduğu bilinmirdi”. DNT analizi nəticəsində kimliyi müəyyənləşdirilən əsgər 20 noyabrda dəfn olunub. Kitab satışı ilə məşğul olan Sənan idman həvəskarı idi. Hərbi xidmətini başa vurmuş olsa da, yenidən orduya qayıtmağı, hərbçi olmağı arzulayırmış. “Polad Həmişov öləndə dedi ki, ana nəsə edə bilərsən, onun üçün ehsan verim? Dedim, əlbəttə edərəm. Halva çaldım, götürdü somavarı da getdi yola. Onunla fəxr edirdi, özü də elə olmaq istəyirdi. Mən də öz oğlumla fəxr eləyirəm”. “Müharibə başlayan gündən o dayanmadı. Komissarlığımıza gündə bəlkə 10-20 dəfə zəng edirdi. Poladın kitabı çıxan gün gətirib mənə hədiyyə elədi. Dedi: “Ata, bax, qəhrəmanımızın adına kitab çıxıb. Bu şeyləri görürdü, fəxr eləyirdi. Özün orada görürdü. Özünə orada yer tapırdı. Məhəllənin girişində gecə ilə bayrağı asdı. Evimizdə, yataq otağımızda. Hər yerdə bayraq asdı. Axırda o bayrağa büküldü, gəldi”. Döyüş yoldaşları, qohum-qonşu, Sənanı tanıyan hər kəs onun qəhrəmanlığından danışır. Dinlədikcə valideynlərinin ürəyinə su səpilir. Ata Şahin Abdullayev deyir ki, yanan ürəklərinə yalnız bütün torpaqların Azərbaycana qaytarılması sakitlik gətirə bilər. “Xəritəmiz bütövləşsəydi, mən haradasa rahat olardım. Ortadakı o sədlər götürülsəydi... Sərhədimizdə öz əsgərimiz olsaydı. Onda arxayın olardım ki, mənim Sənanım boş yerə şəhid olmadı, o cür igidim boş yerə getmədi”. Kanala abunə ol - https://goo.gl/TcM9Fm Bizə maddi dəstək ol https://cutt.ly/destek WebSite: http://www.meydan.tv Facebook: http://fb.com/MeydanTelevision Twitter:   / meydantv   Google+ https://plus.google.com/+MeydanTelevi... İnstagram:   / meydantv   __________________________________________________________________ Xəbərdən çox xəbər var. Çəkin göndərin yayımlayaq - Whatsapp : +4915777662277