Зайсан ауданына жаңа әкім тағайындалды

Облыс әкімі Даниал Ахметов жұмыс сапарымен Зайсан ауданына барып қайтты. Өңір басшысы жергілікті жердегі аудан активімен кездесу өткізіп, мәслихат депутаттарының келісімі негізінде қабылданған шешімді жариялап, ауданға жаңадан тағайындалған әкім - Дулат Қажановты таныстырды. Зайсан ауданын әлеуметтік-экономикалық тұрғыда дамытып, өсіп-өркендетуге негізделген мемлекеттік бағдарламалар мен жобалар көп. Оның бірсыпырасы бұл күнде ойдағыдай іске асып, көрініс табуда. Шекаралық аймақта орналасқан бірегей ауданды дамытуға мемлекеттік басқару ісінде тәжірибесі мол, білікті басшылар тағайындалуда. Аудан әкімі Дулат Қажанов, өзіне жүктеліп отырған үлкен жауапкершілікті сезінетінін айтып, көпшілікпен бірлесіп, ауқымды жұмыстарды ойдағыдай атқаратындығын жеткізді. Жиынға қатысушылар мемлекет басшысы Қасым-Жомарт Тоқаевтың Жолдауында айтылған басым бағыттарға тоқталып, ендігі ретте ауданды дамытудың кешенді іс-шаралар жоспарын пысықтады. Әлеуеті зор өлке тұрғындарын газбен, ауыз сумен қамтамасыз ету, жолдарды қалыпқа келтіріп, салып беру бойынша бірнеше жоба қолға алынған. Зайсан ауданында елдің стратегиялық даму бағыты айқындалған бағдарламалық құжатқа сүйене отырып жұмыс істеу көзделіп отыр. Алдағы уақытта жергілікті тұрғындардың тұрмыс салтын жақсартып, ауданды көркейтуге ерекше назар аударылмақ.