Rubina Abro | جي ناء الوداعي نوٽ روبینہ ابڙو نوجوان شاعر علي صفدر

الوداعي نوٽ: هن ڏک تي لکڻ لاءِ لفظ ساٿ نه ٿا ڏين. ڪي وڇوڙا اهڙا هوندا آهن جو لفظن جي سڄي لغت خاموش ٿي ويندي آهي... علي صفدر کي اڃان گهڻو جيئڻو هو... هُن وٽ خواب هئا، خواهشون هيون، اڻ لکيل نظم هئا ۽ ڪجھ اڌورا غزل هئا جيڪي سنڌي شاعريءَ جي جهول کي جرڪائن ها... هُن جي تخليقي سفر جا اڃان ڪيترائي پنڌ باقي هئا پر موت اوچتو اچي سندس قلم جي آڱر جهلي ورتي... موت ته هر ڪنھن جو مقدر آهي، هر ڪوئي انھيءَ پنڌ جو پانڌي آهي پر ڪجھ وڇوڙا وقت کان اڳ ٿيندا آهن ۽ دل تي وڌيڪ بار بڻجي پوندا آهن. علي صفدر جي وڃڻ جو ڏک ان ڪري به گھرو آهي جو اڃان سندس ٻچڙا ننڍڙا آهن... اسپتال جي بستري تي به هو پنھنجي تڪليف کان وڌيڪ انھن جي فڪر ۾ رهندو هو. هڪ پيءُ جي اها بيچيني هاڻي دل ۾ ڪنڊي وانگر چُڀندي رهندي... اڄ رڳو هڪ شاعر اسان کان ناهي وڇڙيو پر ڪيترائي نظم، ڪيترائي غزل، ڪيترائي اڻچيل احساس به ساڻ کڻي هليو ويو آهي... جيڪي هاڻي ڪڏهن به نه پڙهي سگهبا...!!! روبينه ابڙو