張震嶽首奪金曲奬華語歌王 蔡依林掃三大奬相隔19年再封后

張震嶽首奪金曲奬華語歌王 蔡依林掃三大奬相隔19年再封后 第37屆台灣金曲奬日前圓滿落幕， 張震嶽 首度奪得「最佳華語男歌手」奬，更同時拿下「最佳作曲人獎」與「最佳華語專輯獎」；至於 蔡依林 相隔19年再封歌后，一舉抱走「年度專輯獎」、「最佳華語女歌手獎」以及「最佳演唱錄音專輯獎」三項大奬！ Jolin喺25年前曾被音樂人陳珊妮同製作人林暐哲列入「十大爛歌手」名單，如今喺金曲獎橫掃大奬、二度封后，證明佢嘅音樂實力已經有目共睹。 今次大碟係Jolin第一次做製作人，令佢覺得完成一次自我挑戰，呢件事喺20年前嘅自己係唔可能想像到嘅事，亦超越自己嘅渴望，而得奬係一件錦上添花嘅事，佢好開心得到評審嘅鼓勵。Jolin仲話自己嘅慶功方式係打開日記，再重溫一次所走過嘅路。Jolin亦形容呢次得奬只係一個起點，希望奬項可以幫佢解決之後喺創作上面對嘅困難。 阿嶽對上一次出專輯已經係12年前嘅事，呢次出碟真係傾盡心血，亦同過往風格有所不同。阿嶽話自己以前嘅音樂風格比較叛逆，但隨年齡身份變化，成為人父人夫後，對創作上都有所改變。不過自己仍然保留赤子之心，會永遠用好奇心去看待呢個世界，時刻提醒自己要放低視野睇世界。 蕭煌奇 呢位常勝將軍再封台語歌王，成為金曲獎史上第一位五次奪得同一奬項嘅男歌手，令佢笑言自己可以開「五金行」。蕭煌奇透露，自己喺專輯放入唔同元素，亦有邀請唔同朋友合作，想將久違嘅聲音繼續流傳落去，將台語歌發揚光大。 而 A-Lin 就憑《幸福在歌唱》成為年度歌曲奬嘅得主，佢亦係呢個典禮嘅主持人。唔少人都大讚A-Lin主持得精彩又搞笑，更有一幕係 A-Lin喺推住BB車出場，揭開車罩展出疑似係酒嘅飲品。A-Lin就話，其實飲品都係無酒精嘅，因為大會驚有人會過敏，同埋飲醉酒就會有蝦碌事。 唔講唔知，原來阿嶽係A-Lin嘅表妹夫。A-Lin都話喺表妹夫拎作曲人奬時，已經喺後台率先送上祝賀，又大讚佢將生活呈現喺音樂裡面。 紅地氈上亦星光熠熠，現身藝人包括莫文蔚、盧廣仲、告五人、女團幻藍小熊、鼓鼓呂思緯、陳明珠等，場面相當熱鬧。 #蔡依林 #張震嶽 #蕭煌奇 #ALin #莫文蔚 #盧廣仲 #金曲奬 #台灣 #華語歌手 #華語歌王 #華語歌后 #台語 #音樂成績 #流行音樂 #橫掃大奬 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞 即刻Follow TVB 娛樂新聞台 Facebook專頁   / tvbenews   登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0