"BUNU SADIQ SADIQOVDAN SORUŞMAQ LAZIMDIR"

"Qəbələ" ilə oyunun ardından "Neftçi"nin sədri Çingiz Abdullayev Supersport.Az-a açıqlama verib. Klub rəhbəri, məğlubiyyətin səbəbi haqda çox danışmaq istəməyib: "Çox istəyirdik ki, komandamız qələbə qazansın. Lakin bəzi səhvlər buna imkan vermədi. Çox təəssüf ki, oyun alınmadı və uduzduq. Konkret hansı səbəbdən məğlubiyyət olduğunu demək istəmirəm. Bunu baş məşqçi deməlidir. Oyunu veteranlardan Nazim Süleymanov, İsgəndər Cavadov da izlədilər, fikirlərini bildirdilər. Paltardəyişmə otağında uşaqlara dedim ki, ruhdan düşməsinlər. Başa düşürəm onlar uduzmaq istəmirdilər, qalib gəlmək istəyirdilər. Kubokun yarımfinal mərhələsinin cavab oyunundan sonra finala vəsiqə qazanacağıq". Cənab Abdullayev keçmiş prezident, hazırda Müşahidə Şurasının üzvü Sadıq Sadıqovla münasibətlərinin soyuq olmadığını bildirib: "Çox vaxt birgə oluruq. Ancaq bu dəfə o, özünü narahat hiss etdiyi üçün gəlməyib. Mən bildiyim qədər küskünlük, inciklik yoxdur. Bunu Sadıq Sadıqovdan soruşmaq lazımdır. O, təcrübəli şəxsdir və bundan faydalanacağıq". "Neftçi"nin sədri, azarkeşlərin klubun loqosunun dəyişmək istəyinə etiraz etməsini normal qarşılayıb: Bu məsələ ilə bağlı azarkeşlərin həm müsbət, həm də mənfi fikirləri ola bilər. Onlarla da məsləhətləşmə olacaq".