RAIS MSTAAFU WA ZANZIBAR AFICHUA SIRI YA URITHI ALIOACHIWA NA MAREHEMU LOWASSA

#HABARI Rais Mstaafu wa Serikali ya Mapinduzi ya Zanzibar, Abeid Amani Karume, amesema sababu kubwa iliyomfanya akubali kuwa Mwenyekiti wa Bodi ya Edward Lowassa Foundation ni historia ya uhusiano wake wa karibu na marehemu Edward Lowassa, ambaye amemtaja kuwa alikuwa rafiki wa kweli na kiongozi aliyependa kushirikiana na wenzake. Akizungumza leo Juni 27, 2026, katika kikao kilichowakutanisha wajumbe wa Bodi ya Edward Lowassa Foundation, Karume alisema urafiki wao ulijengwa kwa misingi ya kuheshimiana, kuaminiana na kuwa na maono yanayofanana kuhusu uongozi na maendeleo ya nchi. Karume alieleza kuwa tangu walipokutana kwa mara ya kwanza bungeni, Lowassa alimkaribisha kwa moyo mkunjufu na kumfanya ajisikie sehemu ya kundi la viongozi waliokuwa wakizungumza lugha moja kuhusu masuala ya kitaifa na ustawi wa wananchi. Akikumbuka kipindi cha harakati za kisiasa mwaka 2000, Karume alisema maandalizi ya safari yake ya kuwania urais wa Zanzibar kupitia vikao vya Halmashauri Kuu ya Taifa yalianzia nyumbani kwa Lowassa, jambo ambalo amesema haliwezi kufutika katika kumbukumbu zake. ✍🏿 @mariamshabanitz #taimediatz #taimediatv