GAMBO AIBUA TUHUMA UPIGAJI FEDHA ARUSHA, SPIKA ATOA MAAGIZO

Mbunge wa Arusha Mjini (CCM), Mrisho Gambo amedai kuwa kuna ‘harufu’ ya upigaji fedha kwenye ujenzi wa jengo la utawala mkoani humo, huku akidai gharama za mradi huo zinatofautiana na zile za orodha ya manunuzi ya vifaa (BOQ). Gambo ameyasema hayo leo Jumatano Aprili 16, 2025 na akichangia hotuba ya Wizara ya Nchi, Ofisi ya Rais, Tawala za Mikoa na Serikali za Mitaa (Tamisemi) ya makadirio ya mapato na matumizi kwa mwaka wa fedha 2025/26. Tuhuma hizo zimemuibua Spika wa Bunge la Jamhuri ya Muungano wa Tanzania, Dk Tulia Ackson aliyemtaka Waziri wa Tamisemi, Mohammed Mchengerwa kufuatilia tuhuma hizo alizoziita ‘nzito’ na kuagiza kuja na ripoti fupi. Mchengerwa akijibu baada ya mchango wa Gambon a maagizo ya spika amesema: “Nimelipokea jambo hilo na tutawasilisha taarifa hiyo wakati wa kuhitimisha. Hili la kusema fedha hii ingefanya hivi na siyo vile, ni vyema tukakumbushana kuwa mipango ya maendeleo, haipangwi na Tamisemi ila ni vikao maalumu katika mabaraza ya madiwani ambayo sisi sote ni wajumbe.”