Tensione në Maqedoni, persona të armatosur qëllojnë në makinë e Ali Ahmetit - (12 Maj 2008)

Lajme arkiva 2008 Hapja e fushatës elektorale ka rindezur tensionet në Maqedoni. Incidentet e nisura një ditë më parë kanë kulmuar në një miting të Partisë Bashkimit Demokratik për Integrim në Rakovec të Tetovës. Personat e armatosur kanë qëlluar ndaj automjetit të blinduar të kreut të kësaj partie Ali Ahmeti. Vetë Ahmeti nuk ka pësuar asnjë dëmtim por plumbat kanë plagosur një 24-vjeçar. Për këtë ngjarje në një intervistë telefonike për TV Klan, Ahmeti ka akuzuar drejt për drejt njerëz të partisë Demokratike Shqiptare në Maqedoni. Ali Ahmeti: “Kam hypur në makinën time dhe pasi kam hipur në makinën, atëherë janë dëgju rafalat pas meje. Për fat makina ka qenë e blinduar. Dihen se kush janë aktorët e krimit, të gjitha informatat që ne i kemi marrë do thotë janë njerëz të afërt të sigurimit të zotit Thaçi”. Por Partia Demokratike Shqiptare i ka hedhur poshtë këto akuza. Zëdhënësi i shtabit të saj elektoral Ferxhi Selami tha për TV Klan, se PDSH distancohet nga ngjarja dhe nga çdo akt tjetër dhune. Ferxhi Selami: “PDSH distancohet nga të gjitha aktet e dhunshme, të cilat kanë ndodhur para fillimit të kampanias. Dënojmë të gjitha aktet e dhunës themi strikt se PDSH nuk është pjesë e këtyre aktiviteteve të dhunshme. Ne u bëjmë apel organeve të rendit dhe qetësisë në Maqedoni që këto akte të dhunshme të zbardhen sa më shpejt që është e mundur”. Gjatë së hënës janë shënuar edhe disa incidente të tjera, ku janë sulmuar disa shtabe zgjedhore të PDI-së në Tetovë. Ambasada amerikane në Shkup i ka dënuar këto akte, duke thënë se dhuna nuk ka vend në këtë proces demokratik. Partitë shqiptare garojnë të vetme në këto zgjedhje të parakohshme dhe shpesh herë kohët e fundit kanë akuzuar njëra-tjetrën se po punojnë kundër interesave të shqiptarëve./tvklan.al Gazetare: Urita Dokle SUBSCRIBE to “RTV KLAN” on YouTube for more videos! Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow rtvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/