«Сәтті жұлдыз» ұлттық лотереясына қатысқан Шымкент тұрғыны 1 миллион доллар жеңіп алды

«Сәтті жұлдыз» ұлттық лотереясына қатысқан Шымкент тұрғыны 1 миллион доллар жеңіп алды. Бұл ел тарихында бұрын-соңды болмаған ең қомақты ұтыс. Күтпеген жерден миллионер атанған азамат ірі көлемдегі жүлдені "Сәтті жұлдыздың" ТелеБинго лотереясында иеленген. Ал енді жеңімпаз ол ақшаны қайда жұмсайды? Тағы қандай бағалы сыйлықтар иесі анықталды? Бұл туралы әріптесім Оразай Нұртайұлы айтсын. 584 миллион теңге. Бұл Сәтті жұлдыздың ғана емес, жалпы отандық лотерея тарихындағы ең ірі ұтыс. Ал оны Шымкентте тұратын құрылысшы жеңіп алды. Бүгінде қуанышы қойнына сыймаған азамат ТелеБингоға мереке қарсаңында 14 билет сатып алып қатысқан екен. Осылайша сандары дәл келіп, сол күні-ақ СуперБингоның жеңімпазы атанды. ЖЕҢІМПАЗ: Жеңгенімді білгенде сенбедім. Ұтқан ақшамды қайта-қайта тексердім. Өзімді сабырға келтірдім. Шынымды айтсам, қауіпсіздігіме алаңдаймын, сол үшін де осылай киініп, бет жүзімді жасыруды жөн көрдім. Ұтыс расымен әділ өтті. Рекордтық джекпот иесі бұл ақшаға қайырымдылықпен айналысуды, сондай-ақ жеке бизнес ашуды жоспарлап отыр. Ұлттық лотерея өкілдерінің айтуынша, ТелеБинго тарихында дәл осындай қомақты қаржы соңғы рет 6 жыл бұрын ойнатылған. ШЫНБОЛАТ ПАЗЫЛ, "СӘТТІ ЖҰЛДЫЗ" ұлттық лотереясының ресми өкілі: Жеңімпазды біз лототрон арқылы анықтаймыз. Яғни, сіз билет аласыз 700 теңгеге. Сосын тиражды күтесіз. Ол әр жексенбі сағат 10:00-де болады. Лототроннан түскен шарлар билетіңізде болса белгілейсіз. Онда бірнеше санат бар. Мысалы бір жолақ немесе екі жолақ сәйкес түседі. Бинго, Супербинго санаттары бар. Бұл кісі Супербингоны ұтты. ОРАЗАЙ НҰРТАЙҰЛЫ, тілші: 2025 жылы Сәтті жұлдыз ұлттық лотереясының жеңімпаздары аз емес. Жалпы қатысушылар 16 пәтер, 14 автокөлік пен 26 миллиард теңгеден астам ақшалай жүлде жеңіп алды. #Информбюро #31арна #БастыЖаңалықтар #Новости #31канал