Speciale - Profili politik i Edi Ramës/ Si arriti Rama të bëhet kryetari i PS? - (12 Tetor 2005)

Lajme Arkiva 2005 Pas një stine të nxehtë në kërkim të vetvetes dhe të liderit Partia Socialiste ndoshta do të gjejë pak paqe. Kjo ishte vera pa kthim e Fatos Nanos që befasoi jo vetëm ish-liderin stoik, por edhe vetë njerëzit që besuan deri në fund se ai ishte i pazëvendësueshëm. Fatos Nano: “Të mos shpresojmë më kurrë se Nano do të bëjë sakrifica për karrierën e tyre politike, përkundrazi Nano do të vazhdojë të bëjë sakrifica vetëm po t’ia kërkojë partia e tij të cilës i ka shërbyer me shpirt që nga viti ’91.” Selia e rozë dominuar për 15 vite nga e njëjta figurë tani ka një emër të ri. Në një kongres te diskutueshëm socialistët zgjodhën në krye të tyre Edi Ramën. Edi Rama: “Për mua jeni të gjithë pjesë e familjes time.” Piktor, eseist dhe antikomunist, karriera politike e të cilit ka lidhje të padiskutueshme me njeriun që zëvendësoi jo edhe aq papritur. Tek ngjitej në podium Edit me siguri i është kujtuar një episod i 8 viteve më parë i sapo dalë nga burgu dhe sërish kryeministri një telefonatë e Nanos ishin joshja që detyroi Ramën të lërë Parisin, vendin ku jetonte prej disa vitesh. Një ftesë për të cilën sot pas shumë vitesh Nano me siguri është penduar. Fatos Nano: “Unë mund të kem bërë shumë gjëra, por e nxora nga bataku i fyerjeve. Nga refugjat dhe shitës ikonash të vjedhura në kohën e Saliut, në ministër dhe kryetar të bashkisë më të madhe të Shqipërisë.” Jeta prej bohemi në qytetin e dritave në këmbim të një posti politik në Tiranën e errësirës, kioskave dhe jetës së varfër. Një ndër kritikët më të mëdhenj të qeverisjes demokratike kishte pranuar ofertën për të qenë Ministri i Kulturës i shqiptarëve, Beniamini i Nanos gjithashtu, por idili nuk zgjati veçse pak muaj. Gjërat mes tyre ndryshuan kur Nano humbi karrigen e kryeministrit pas ngjarjes të 14 shtatorit ’98. Distanca gjithsesi jo shumë e dukshme u thellua një vit më pas në ’99 në kongresin e 3-të të socialistëve kur Rama u ravizua si një ndër mbështetësit e Pandeli Majkos, rivali i atëhershëm Nanos. Jo vetëm për të qëndruar në krye të qeverisë, por edhe për të marrë kreun e Partisë Socialiste. Edhe menjëherë Fatos Nano fitoi. Përgjërimet e tij në kongresin socialist të tetorit nuk shkuan dëm. Fatos Nano: “Ju lutem shokë mos më lini sërish vetëm. Ju siguroj dhe besoj se jeni edhe ju të bindur që nuk ka gabuar vetëm Fatos Nano. Është vërtetë bindja ime se ka vend për korrigjime.” Do të mjaftonte humbja e Majkos në kongres dhe afrimi i menjëhershëm me Ilir Metën për të treguar sërish se aleancat e Ramës e kishin jetën të shkurtër. Sidoqoftë rreshtimet e paqëndrueshme pro njërit apo tjetrit figurë të Partisë Socialiste, nuk e shqetësuan Ramën dhe të ardhmen e tij politike. Nuk do të kalonte shumë kohë kur ministrit të kulturës do t’i vinte një tjetër ftesë. Edi Rama kishte nisur kështu betejën për Bashkinë e Tiranës. Edi Rama: “Gjatë të gjithë këtyre ditëve sa herë më vjen radha kam shumë emocione.” Fitorja e padiskutueshme përballë rivalit demokrat Mustafaj e shndërroi Ramën në yllin e ri të politikës, por vetëm për pak kohë. Ndryshe nga profili i tij politik që preferonte tërheqjen Rama filloj dhe sulmin më të ashpër ndaj Nanos. Edi Rama: “Unë do të them kaq që Fatosi është bërë si “Robert çamçakëzi” që vjen vërdallë nëpër kantier me duar në xhepa.” Fatos Nano: “Edi Rama ka një problem moral. E kam marrë me thonj të paprerë si refugjat nga Parisi dhe e kam sjell të bëjë pjesë në ekipet tona qeverisëse dhe përfaqësuese.” “Përmes shpifjes skandaloze, akuzash vulgare dhe koncepte arkaike zoti fatos Nano po godet pabesisht imazhin e ngritur me aq shumë mund dhe punë nga bashkia e re e Tiranës.” “Të zverdhur si kinez, të skuqur si rus e të nxirë si shqiptar”, ishte një nga frazat me të cilat nga sheshet e kryeqytetit në fillim të viteve ’90 Edi Rama ngrinte peshë zemrat e njerëzve. Me të tilla shpikje e fjalime të thurura aty për aty Rama fitoj zemrat jo vetëm të të rinjve, por edhe të veteranëve, punëtorëve, të të gjithëve atyre që me elokuencën e transformimin e Tiranës i bëri për vete. Aq sa për të kërkuar një mandat të dytë në tetor të vitit 2003. Fushata u shtri në çdo cep të periferive kryeqytetase, por edhe në qendër që tashmë kishte marrë ngjyrat e makijazhit Rama.../tvklan.al Gazetare: Beti Njuma SUBSCRIBE to “RTV KLAN” on YouTube for more videos! Për më shumë informacione vizitoni faqen tonë web https://tvklan.al/ Videot e fundit nga Tv Klan i gjeni në faqen https://tvklan.al/video/ Follow Tvklan on Facebook:   / tvklan   Follow rtvklan on Instagram:   / rtvklan   Programet e Tv Klan mund t’i ndiqni edhe në faqen https://tvklan.al/programe/