The Servants at the wedding in Cana: Gospel of Silence( Episode-11) Bible Passage- John 2: 1-11

യോഹന്നാന്റെ സുവിശേഷം 2-ാം അദ്ധ്യായം 2,5, 7 വാക്യത്തിൽ കാനാവിലെ കല്യാണ വീട്ടിലെ ശുശ്രൂഷകന്മാരെ പറ്റി പരാമർശിക്കുന്നുണ്ട്. പേരറിയാത്ത, നാടറിയാത്ത ഈ ചെറു ജീവിതങ്ങളെ പറ്റിയുള്ള പഠനമാണ് നിശബ്ദതയിലെ സുവിശേഷത്തിന്റെ 11-ാം എപ്പിസോഡിൽ വിവരിക്കുന്നത്. കണ്ടംചിറ സെന്റ് തോമസ് , ചന്ദനക്കാവ് ശാലേം മാർത്തോമ്മ ഇടവകകളിൽ വികാരിയായ് ശുശൂഷ ചെയ്യുന്ന റവ. റെനി ഫിലിപ്പച്ചനാണ് ഈ ധ്യാനത്തിന് നേതൃത്ത്വം നൽകുന്നത്. കർത്താവായ യേശു ക്രിസ്തുവിന്റെ പരസ്യ ശുശൂഷയിലെ ആദ്യത്തെ അടയാളമാണ് കാനാവിലെ കല്യാണത്തിന് പച്ചവെള്ളം വീഞ്ഞാക്കിയത്. വിശുദ്ധ വേദപുസ്തകത്തിന്റെ ഏടുകളിൽ ദൈവരാജ്യ ശുശൂഷയ്ക്കു വേണ്ടി ആവോളം അധ്വാനിച്ച്, കടന്ന് പോയ ജീവിതങ്ങൾ നമ്മെയും പ്രചോദിപ്പിക്കുന്നു. ഒരു പ്രതിസന്ധിയിൽ കൂടെയാണ് വിവാഹം നടക്കുന്ന ഭവനം കടന്ന് പോകുന്നത് എന്ന് മനസ്സിലാക്കിയ ശുശ്രൂഷക്കാർ അതിഥിയായ യേശുവിന്റെ അമ്മ മറിയയുടെ വാക്ക് കേട്ട് ഒരു അധ്വാനത്തെ സന്നദ്ധമായി ഏറ്റെടുക്കുകയാണ് . ഏൽപ്പിച്ച ശുശ്രൂഷകൾക്കപ്പുറമായ ഒരു അധ്വാനം ആ ഭവനത്തെ പ്രതിസന്ധിയിൽ നിന്നും വിടുവിച്ചു. ഈ ശുശൂഷകരുടെ ആത്മാർത്ഥതയാണ് വക്കോളം നിറച്ച് എന്ന പരാമർശത്തിലൂടെ നാം ദർശിക്കുന്നത്. സമ്പൂർണ്ണമായ വിശ്വാസത്തോടെ അനുസരിച്ചപ്പോൾ അത്ഭുതത്തിന്റെ ദൃക്‌സാക്ഷികളായി തീരുന്നു. വിശ്വാസത്തിന്റെ കിണറ്റുകരയിൽ നിന്ന്, കലവറയിലേക്കുള്ള യാത്രാ മദ്ധ്യേ എവിടെയോ സംഭവിച്ച അത്ഭുതം. വിരുന്നുവാഴി അറിയാതെ നടന്ന ഈ അത്ഭുതം, അനുഭവിച്ചവർക്കു മാത്രം അറിയുന്ന സത്യമാണ്. നമ്മുടെ കരങ്ങൾ ക്രിസ്തുവിന്റെ ഹിതത്തോട് ചേർത്ത് നിർത്തുമ്പോഴാണ് അസാധ്യങ്ങൾ സംഭവിക്കുന്നത്. യേശു കർത്താവിന്റ പരസ്യ ശുശ്രൂഷയുടെ ആരംഭം ഈ ശുശ്രൂഷകരോട് ചേർന്നായിരുന്നു എന്നതാണ് ഇവരെ ശ്രേഷ്ഠരാക്കുന്നത്. കർത്താവിന് ഇനിയും എന്നിലൂടെയും നിങ്ങളിലൂടെയും അത്ഭുതങ്ങൾ ചെയ്യുവാനുണ്ട്.