tiv 10 mankapartez 3

«Հրաժեշտի ղողանջներ» Հունիսի 12-ին Արմավիր քաղաքի թիվ 10 մսուր-մանկապարտեզում կայացավ «Հրաժեշտի ղողանջներ» խորագիրը կրող ավարտական հանդիսավոր միջոցառումը։ Միջոցառմանը ներկա էին Արմավիր քաղաքի համայնքապետ Վարշամ Սարգսյանը, ինչպես նաև Արմավիրի քաղաքապետարանի կրթության,գիտության,մշակույթի,սպորտի և երիտասարդության հարցերի բաժնի պետ Սամվել Գալստյանը։ Մանկապարտեզի սաները ներկայացրին հայեցի ու ազգային շնչով հագեցած գեղարվեստական ծրագիր՝ հայկական երգերով, հայրենասիրական ելույթներով և ազգային պարերով։ Փոքրիկների կատարումները ջերմ ընդունելության արժանացան ներկաների կողմից։ Օրվա ամենահուզիչ պահերից մեկը համայնքապետ Վարշամ Սարգսյանի մասնակցությունն էր միջոցառմանը, քանի որ շրջանավարտների շարքում էր նաև նրա երեխան։ Համայնքապետը, չթաքցնելով իր հուզմունքը, շնորհավորեց փոքրիկներին, ծնողներին և մանկավարժներին՝ ընդգծելով նախադպրոցական կրթության կարևոր դերը երեխաների կյանքի ու զարգացման գործում։ Իր խոսքում նա նշեց, որ համայնքի համար առաջնահերթություններից են երեխաների համար բարեկարգ և ժամանակակից պայմանների ստեղծումը, և վստահեցրեց, որ մանկապարտեզների վերակառուցման ու բարեկարգման ծրագրերը լինելու են շարունակական։ Նրա խոսքով՝ համայնքային իշխանությունները շարունակելու են ներդրումներ կատարել կրթական հաստատությունների զարգացման ուղղությամբ, որպեսզի երեխաները կրթվեն առավել հարմարավետ և անվտանգ միջավայրում։ Միջոցառումն անցավ ջերմ մթնոլորտում՝ լի ժպիտներով, հուզիչ պահերով և ապագայի հանդեպ մեծ հավատով։ «Հրաժեշտի ղողանջներ» ավարտական հանդեսը դարձավ գեղեցիկ ամփոփում մանկապարտեզային տարիների և խորհրդանշական սկիզբ՝ դեպի դպրոցական նոր կյանք։ Հանդիսության ավարտը նշանավորվեց խորհրդանշական արարողությամբ․ փոքրիկ շրջանավարտները երկինք բաց թողեցին փուչիկներ՝ ի նշան խաղաղության, բարության և իրենց երազանքների թռիչքի։ Նյութը պատրաստեց՝Ջավահիր Եղիազարյանը