POGRADECI DOKUMENTAR. Video 37. NJË JETË NË SKENË Regjisori Piro Xëci, Dokumentar. Mars 2002.

Midis personaliteteve të njohur të skenës në Pogradec, që kanë lënë gjurmë ndër vite në jetën artistike të këtij qyteti, është edhe aktori e regjisori Piro Xëci. Një talent natyral, me tipare të spikatura të humorit dhe batutës, Piroja e nisi karierën si një aktor amator në trupën e teatrit amator, për tu bërë më pas edhe regjisor i tij. Derisa nisi të punojë me tetarin e kukllave, të cilit i dha tipare profesioniste, të njohur edhe në shkallë vendi. Piroja është krijuesi i këtij teatri në Pogradec, duke dhënë qindra shfaqje dhe duke edukuar dhe dëfryer breza të tërë fëmijësh. I vlerësuar me çmime dhe medalje për punën e tij, ai nuk reshti së dhëni kontributin e tij deri në moshë të thyer, duke lënë kështu gjurmë të pashlyeshme në traditën artistike të këtij qyteti. Teatri i kukllave në Pogradec, që mban sot emrin e tij, vazhdon të përgatisë dhe japë shfaqje për fëmijët, nën drejtimin e regjisorit Sotiraq Gusho, i cili e ngriti edhe më tej nivelin e këtij teatri, përshtatur kërkesave dhe nivelit të kohëve të reja. Ky dokumentar i kushtohet punës dhe jetës të këtij artisti, të talentuar dhe të palodhur, Piro Xëci. Autorë Gëzim Hunçi, Zenel Lamçe, xhiruar në mars 2002. (VHS)