ASKARI WANAFUNZI WA SHULE YA POLISI TANZANIA WANUSURIKA AJALINI KILIMANJARO

Hai. Wanafunzi askari (kuruta) 15 wa Shule ya Polisi Tanzania (TPS) Moshi zamani CCP mkoani Kilimanjaro wamenusurika kifo baada ya gari walilokuwa wakisafiria kugongana uso kwa uso na gari aina ya Fuso. Ajali hiyo imetokea leo Jumanne Agosti 12, 2025 katika eneo la Kwa Sadala, Wilaya ya Hai mkoani Kilimanjaro baada ya gari lililobeba wanafunzi hao likitokea kambi ya polisi iliyopo wilayani Siha kugongana uso kwa uso na fuso iliyokuwa ikitokea Wilaya ya Moshi. Mkuu wa Mkoa wa Kilimanjaro, Nurdin Babu amethibitisha kutokea kwa ajali hiyo leo Agosti 12, 2025 na kueleza kuwa majeruhi wamepelekwa katika Hospitali ya Wilaya ya Hai kwa matibabu. "Leo saa tano asubuhi, nimepata taarifa kuwa kuna ajali imetokea eneo la karibu na Kwa Sadala, Wilaya ya Hai iliyosababishwa na magari mawili, Landcruiser ya jeshi la polisi na Fuso na kusababisha majeruhi," amesema RC Babu. Ameongeza kuwa "Magari haya yamegongana uso kwa uso ambapo moja lilikiwa linatoka upande wa Moshi na jingine upande wa Bomang'ombe, Kwenye gari ya polisi kulikuwa na vijana wetu ambao walikiwa wanatoka kwenye kambi ya jeshi la polisi kuja mjini Moshi na Fuso lilikuwa kwenye shughuli zake za kawaida". Mganga Mfawidhi wa hospitali ya Wilaya ya Hai, Dk Emmanuel Minja amesema wamepokea majeruhi 15 na mmoja kati ya majeruhi hao amepewa rufaa ya kwenda Hospitali ya KCMC kwa matibabu zaidi. Amesema mpaka sasa wanaendelea vizuri na matibabu baada ya baadhi yao kushonwa na kupatiwa matibabu ya haraka.